ന്യൂഡൽഹി: രാജ്യത്തെ ഏറ്റവും പാരമ്പര്യമുള്ള ബിസിനസ് സ്ഥാപനങ്ങളിൽ ഒന്നായ ടാറ്റ ഗ്രൂപ്പിന് പ്രത്യേകിച്ച് പരിചയപ്പെടുത്തലുകളുടെ ആവശ്യമില്ല. അടുക്കളയിൽ ഉപയോഗിക്കുന്ന ഉപ്പ് മുതൽ ആകാശത്തിലുളള എയർ ഇന്ത്യ വിമാനങ്ങളിൽ വരെ ഈ ബ്രാൻഡ് നാമം കാണാം. ആധുനിക ഭാരതത്തെ ശക്തിപ്പെടുത്തുന്നതിൽ വലിയ പങ്കാണ് ടാറ്റ ഗ്രൂപ്പ് വഹിച്ചത്. പുതിയ പാർലമെന്റ് മന്ദിരം, അയോദ്ധ്യയിലെ രാമക്ഷേത്രം എന്നിവയുടെ നിർമാണത്തിലും സുപ്രധാന ചുമതല ടാറ്റയ്‌ക്കുണ്ടായിരുന്നു.
പുതിയ പാർലമെന്റ് നിർമാണം പൂർണ്ണമായും ടാറ്റ പ്രോജക്ടസിന്റെ നേതൃത്വത്തിലായിരുന്നു. 861.90 കോടി രൂപയ്‌ക്കാണ് ടാറ്റ പ്രോജക്ട്‌സ് പാർലമെന്റ് നിർമാണത്തിനുള്ള കരാർ നേടിയത്. എൽ& ടിയും ടെൻഡറിൽ പങ്കെടുത്തിരുന്നെങ്കിലും 865 കോടിരൂപയായിരുന്നു അവർ ക്വാട്ട് ചെയ്ത തുക. അതൊടെ ടാറ്റ ഗ്രൂപ്പിന് ടെൻഡർ ലഭിക്കുകയായിരുന്നു. ഭാരതത്തിന്റെ യശസ്സും പ്രൗഢിയും ഉയർത്തിയ പാർലമെന്റ് മന്ദിരം നിശ്ചിത കാലേയളവിനും മുൻപ് പൂർത്തിയാക്കിയത് ടാറ്റ ഗ്രൂപ്പിന്റെ അക്ഷീണ പ്രയത്‌നം കൊണ്ടാണ്. നിർമാണ മികവിലും ഭംഗിയിലും ലോകത്തിലെ മറ്റേത് കെട്ടിടങ്ങളേക്കാൾ ഒരുപടി മുന്നിൽ നിർത്താനും ടാറ്റ കൺസ്ട്രക്ഷൻസ് ശ്രദ്ധിച്ചിരുന്നു. പുതിയ പാർലമെന്റ് മന്ദിരം കാണുന്ന ആർക്കും ഇത് ഒറ്റനോട്ടത്തിൽ തന്നെ വ്യക്തമാകും.
രാമക്ഷേത്ര നിർമാണത്തിന്റെ മാനേജ്മെന്റ് കൺസൾട്ടന്റായാണ് ടാറ്റ കൺസൾട്ടിംഗ് എഞ്ചിനീയേഴ്സ് പ്രവർത്തിക്കുന്നത്. ക്ഷേത്രത്തിന്റെ നിർമാണം എൽ&ടി നിർവഹിക്കുമ്പോൾ അതിന്റെ പ്രവർത്തനം വിലയിരുത്തുന്നത് ടാറ്റയിൽ നിന്നുള്ള എഞ്ചിനിയറിംഗ് സംഘമാണ്.
ജാംഷെഡ്ജി ടാറ്റ: ഇന്ത്യൻ കോർപ്പറേറ്റ് മേഖലയുടെ പിതാവ്
ഗ്രൂപ്പിന്റെ സ്ഥാപകനായ ജാംഷെഡ്ജി ടാറ്റയെ ഇന്ത്യൻ കോർപ്പറേറ്റ് മേഖലയുടെ പിതാവ് എന്നാണ് അറിയപ്പെടുന്നത്. രാജ്യത്തിന്റെ ആദ്യത്തെ സംഘടിത വ്യവസായ സ്ഥാപനമായ ടാറ്റ സ്റ്റീൽ പ്ലാന്റ് 1907 ലാണ് അദ്ദേഹം ആരംഭിച്ചത്. ഇന്ത്യയിലെ ആദ്യ സിമന്റ് കമ്പനിയും ഇവരുടെ സംഭാവനയാണ്. 1912 ലാണ് സിമന്റ് ഫാക്ടറി തുടങ്ങിയത്. രാജ്യത്തെ ആദ്യത്തെ വ്യാവസായിക ബാങ്കായ ടാറ്റ ഇൻഡസ്ട്രിയൽ ബാങ്കിന് 1917-ൽ തുടക്കമിട്ടത് ടാറ്റയെന്ന രണ്ടക്ഷരമാണ്.
1919-ൽ ആരംഭിച്ച രാജ്യത്തെ ആദ്യത്തെ സമ്പൂർണ ഇന്ത്യൻ ഇൻഷുറൻസ് കമ്പനിയായ ന്യൂ ഇന്ത്യ അഷ്വറൻസും ടാറ്റയിൽ നിന്നാണ് പിറവിയെടുത്തത്. വ്യോമയാന കമ്പനിയായ ടാറ്റ എയർലൈൻസ് (ഇപ്പോൾ എയർ ഇന്ത്യ) 1932 ലാണ് ആരംഭിച്ചത്. 1983-ൽ ഇന്ത്യയിൽ ആദ്യമായി അയോഡൈസ്ഡ് ഉപ്പ് പാക്കറ്റുകളിൽ വിൽക്കാൻ തുടങ്ങിയതും ടാറ്റയാണ്.
