പ്രോട്ടീസിനെതിരെയുള്ള രണ്ടു ടെസ്റ്റ് മത്സരങ്ങളുടെ പരമ്പര ഇന്നു മുതലാണ് ആരംഭിക്കുന്നത്. സെഞ്ചൂറിയനിലാണ് ആദ്യ ടെസ്റ്റ്. ഇതിനെ ബോക്സിംഗ് ഡേ ടെസ്റ്റെന്നാണ് വിളിക്കുന്നത് അതിനൊരു കാരണവും ചരിത്രം പറയുന്നുണ്ട്. അത് എന്താണെന്ന് നോക്കാം. മെൽബൺ ക്രിക്കറ്റ് ഗ്രൗണ്ടിൽ എല്ലാ വർഷവും ഡിസംബർ 26 മുതൽ 30 വരെ നടക്കുന്ന ടെസ്റ്റ് മത്സരമാണ് ബോക്സിംഗ ഡേ ടെസ്റ്റ് എന്നറിയപ്പെടുന്നത്. പിന്നീട് ദക്ഷിണാഫ്രിക്ക, ന്യൂസിലൻഡ് രാജ്യങ്ങളിലും ബോക്സിംഗ് ഡേ ടെസ്റ്റ് തുടങ്ങി.
ബ്രിട്ടിഷ് സാമ്രാജ്യത്തിന്റെ അധീനതയിലായിരുന്ന രാജ്യങ്ങൾ ഡിസംബർ 26 ‘ബോക്സിംഗ് ഡേ’ എന്ന പേരിൽ ആഘോഷിച്ചുവരുന്നു. ക്രിസ്മസ് ആഘോഷം കഴിഞ്ഞ് പിറ്റേന്ന് തൊഴിലാളികൾക്ക് ക്രിസ്മസ് സമ്മാനം നൽകുന്ന ചടങ്ങ് ബ്രിട്ടനിലുണ്ടായിരുന്നു. ‘ക്രിസ്മസ് ബോക്സ് സമ്മാനങ്ങൾ’ എന്നാണ് ഇവ അറിയപ്പെട്ടിരുന്നത്. ഇതോടെയാണ് ഡിസംബർ 26ന് ബോക്സിംഗ് ഡേ എന്നു പേരുവന്നത്. ഈ ദിവസം തുടങ്ങുന്ന ടെസ്റ്റുകൾക്ക് ബോക്സിംഗ് ഡേ ടെസ്റ്റ് എന്നറിയപ്പെടുന്നു.1950ൽ ഇംഗ്ലണ്ട്–ഓസ്ട്രേലിയ ആഷസ് പരമ്പരയിലാണ് ആദ്യ ബോക്സിങ് ഡേ ടെസ്റ്റ് നടന്നത്.1980 മുതൽ എല്ലാ വർഷവും ബോക്സിങ് ഡേ ടെസ്റ്റുണ്ട്.
ബോക്സിംഗ് ഡേ ടെസ്റ്റിൽ ഇന്ത്യക്ക് അത്ര നല്ല റെക്കോർഡ് അല്ല പറയാനുള്ളത്. ഇതുവരെ കളിച്ച 17 ബോക്സിംഗ് ഡേ ടെസ്റ്റിൽ നാല് തവണ മാത്രമാണ് ഇന്ത്യക്ക് ജയിക്കാനായത്. 10 തവണ തോൽവിയും രുചിച്ചു. ദക്ഷിണാഫ്രിക്കയ്ക്ക് എതിരെ കളിച്ച ആറു മത്സരങ്ങളിൽ 2 വിജയമാണ് ഇന്ത്യക്കുള്ളത്. ഇന്ത്യയുടെ എതിരാളികളും ഫലവും ഇങ്ങനെ. 2003ൽ ഓസ്ട്രേലിയക്കെതിരെ 195 റൺസടിച്ച വീരേന്ദർ സെവാഗിന്റേതാണ് ഏറ്റവും ഉയർന്ന സ്കോർ. 2014 ൽ മെൽബണിൽ വിരാട് കോലി നേടിയ 169 ഉം രഹാനയുടെ 147 ഉം തിളക്കമേറിയ ഇന്നിംഗ്സുകളാണ്.
1985- ഓസ്ട്രേലിയ-സമനില
1987-വിൻഡീസ്-സമനില
1991-ഓസ്ട്രേലിയ-തോൽവി
1992-ദക്ഷിണാഫ്രിക്ക-തോൽവി
1996-ദക്ഷിണാഫ്രിക്ക-തോൽവി
1998-ന്യൂസിലൻഡ്-തോൽവി
1999-ഓസ്ട്രേലിയ-തോൽവി
2003-ഓസ്ട്രേലിയ-തോൽവി
2006-ദക്ഷിണാഫ്രിക്ക-തോൽവി
2007-ഓസ്ട്രേലിയ-തോൽവി
2009-ദക്ഷിണാഫ്രിക്ക-ജയം
2011-ഓസ്ട്രേലിയ-തോൽവി
2013-ദക്ഷിണാഫ്രിക്ക-തോൽവി
2014-ഓസ്ട്രേലിയ-സമനില
2018-ഓസ്ട്രേലിയ-ജയം
2020-ഓസ്ട്രേലിയ-ജയം
2021-ദക്ഷിണാഫ്രിക്ക-ജയം
