ന്യൂഡൽഹി: പാകിസ്താനിൽ നിന്നുള്ള ഡ്രോൺ വെടിവച്ചു വീഴ്ത്തി അതിർത്തി സുരക്ഷാസേന. മയക്കുമരുന്നു കടത്താൻ വേണ്ടി ഉപയോഗിച്ച പാക് ഡ്രോണാണ് ബിഎസ്എഫ് തകർത്തത്.
അതിർത്തി കടന്നുവരുന്ന ഡ്രോണും ഇതിൽ ടേപ്പുകൊണ്ട് ഒട്ടിച്ച് തൂക്കിയിട്ട നിലയിൽ ഒരു പൊതിയും ബിഎസ്എഫിന്റെ ശ്രദ്ധയിൽപ്പെടുകയായിരുന്നു. അസ്വാഭാവികത മനസിലാക്കിയ ബിഎസ്എഫ് ഡ്രോൺ വെടിവച്ചിട്ടു. പഞ്ചാബതിർത്തിലായിരുന്നു സംഭവം. തുടർന്ന് നടത്തിയ തിരച്ചിലിലാണ് 434 ഗ്രാം ഹെറോയിൻ ഡ്രോണിൽ നിന്നും സേന കണ്ടെത്തിയത്.
ഇക്കൊല്ലം ഇതുവരെ 100 പാക് ഡ്രോണുകൾ ഇത്തരത്തിൽ വെടിവച്ചിട്ടതായി പഞ്ചാബ് ബിഎസ്എഫ് എക്സിൽ കുറിച്ചു. ഡ്രോണുകളെ മാത്രമല്ല മയക്കു മരുന്ന് കടത്താൻ ശ്രമിച്ച വ്യക്തികളെയും ബിഎസ്എഫ് പിടികൂടിയിട്ടുണ്ട്.
2014 വരെ അതിർത്തി വഴി മയക്കുമരുന്നു കടത്ത് വ്യാപകമായിരുന്നു. എന്നാൽ കഴിഞ്ഞ 9 വർഷത്തിനിടെ ലഹരിക്കടത്തിന് തടയിടാൻ ബിഎസ്എഫിന് സാധിച്ചിട്ടുണ്ട്. 1.5 ലക്ഷം കിലോഗ്രാം മയക്കുമരുന്നാണ് ഇക്കാലയളവിൽ അതിർത്തി സുരക്ഷാ സേന നശിപ്പിച്ചത്.