അയോദ്ധ്യയിലെ ശ്രീരാമ ക്ഷേത്രത്തിന്റെ പ്രാണ പ്രതിഷ്ഠാ ചടങ്ങിൽ പങ്കെടുക്കുന്നവർക്ക് പ്രത്യേക സമ്മാനങ്ങളും ലഭിക്കും. 7000-ൽ അധികം വ്യക്തികളെയാണ് പ്രാണ പ്രതിഷ്ഠാ ചടങ്ങിനായി ട്രസ്റ്റ് ക്ഷണിച്ചിട്ടുള്ളത്. ചടങ്ങിൽ സംബന്ധിക്കുന്നവർക്ക് പ്രസാദത്തോടൊപ്പം അയോദ്ധ്യാ ദർശൻ പുസ്തകമായിരിക്കും സമ്മാനമായി നൽകുകയെന്ന് ട്രസ്റ്റ് അറിയിച്ചു. എന്നാൽ തിരഞ്ഞെടുത്ത ഏതാനും ചില വിശിഷ്ട വ്യക്തികൾക്ക് മൂന്ന് അധിക പുസ്തകങ്ങളും ലഭിക്കും.
ഗീതാ പ്രസ്സാണ് പുസ്തകത്തിന്റെ കോപ്പികൾ അച്ചടിക്കുക. രാംലല്ലയുടെ വിഗ്രഹ പ്രതിഷ്ഠയോടനുബന്ധിച്ച് അയോദ്ധ്യ ദർശന്റെ 10000 കോപ്പികളാണ് പ്രത്യേകമായി അച്ചടിക്കുന്നത്. അയോദ്ധ്യാ നഗരത്തിന്റെ ചരിത്രവും പ്രധാന്യവും രാമായണത്തിലെ കഥകളും ക്ഷേത്രങ്ങളെക്കുറിച്ചുള്ള വിവരങ്ങളുമാണ് അയോദ്ധ്യ ദർശനിലുള്ളത്. പുസ്തകത്തിന്റെ കവർ പേജിൽ രാമക്ഷേത്രത്തിന്റെയും ശ്രീരാമന്റെയും ചിത്രവും പ്രതിഷ്ഠാ ചടങ്ങിന്റെ തിയതിയും ഉണ്ടായിരിക്കും. സമ്മാനമായി നൽകുന്ന 10,000 പുസ്തകങ്ങളിലും ‘സുപ്രീം ഓഫറിംഗ്’ എന്ന പേരിൽ ഗൊരഖ്പൂരിലെ ഗീതാ പ്രസ്സിൽ നിന്നുള്ള പ്രത്യേക കുറിപ്പും ഉണ്ടായിരിക്കും.
തിരഞ്ഞെടുത്ത 100 വിശിഷ്ഠ അതിഥികൾക്ക് ‘ അയോദ്ധ്യാ മാഹാത്മ്യം ‘ (അയോദ്ധ്യയുടെ മഹത്വം), ‘ ഗീത ദൈനന്ദിനി ‘ (ഗീത ഡയറി), ശ്രീരാമനെക്കുറിച്ചുള്ള ലേഖനം ഉൾക്കൊള്ളുന്ന ‘കല്യാൺ പത്ര ‘ മാസികയുടെ 1972 ലെ പ്രത്യേക പതിപ്പ് എന്നിവയായിരിക്കും അധിക സമ്മാനമായി ലഭിക്കുക. അയോദ്ധ്യയുടെ മഹത്വത്തെക്കുറിച്ചുള്ള വിവിധ ലേഖനങ്ങൾ അടങ്ങിയ അയോദ്ധ്യാ മാഹാത്മ്യം എന്ന പുസ്തകവും ഗീതാ പ്രസ്സാണ് അച്ചടിക്കുക. 45 പേജുകളുള്ള ഇതിൽ അയോദ്ധ്യയെ കുറിച്ചുള്ള അച്ചടിച്ച ചിത്രങ്ങളാണുള്ളത്. ഭഗവദ്ഗീതയിലെ വാക്യങ്ങൾ ഉൾക്കൊള്ളിച്ച ഇംഗ്ലീഷിലും ഹിന്ദിയിലും തിയതികളുള്ള ‘ ഗീത ദൈനന്ദിനി ‘ ഡയറിയാണ് മറ്റൊരു സമ്മാനം. ഈ ഡയറിയിൽ വൃതങ്ങൾ, ഉത്സവങ്ങൾ, സൂര്യോദയ-സൂര്യാസ്തമയ സമയങ്ങളെക്കുറിച്ചുള്ള വിശദാംശങ്ങൾ എന്നിവ ഉൾപ്പെടുന്നു.
