ന്യൂഡൽഹി: മുംബൈയിലെ ട്രാൻസ് ഹാർബർ ലിങ്ക് (എംടിഎച്ച്എൽ) പ്രധാനമന്ത്രി നരേന്ദ്രമോദി ജനുവരി 12ന് ഉദ്ഘാടനം ചെയ്യുമെന്ന് മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ അറിയിച്ചു. രാജ്യത്തെ ഏറ്റവും നീളമേറിയ സമുദ്രപാലമാണ് എംടിഎച്ച്എൽ പദ്ധതി. മുംബൈയിലെ സേവ്രി മുതൽ റായ്ഗഡിലെ ഹാവ ഷേവ വരെ നീളുന്ന സമുദ്രപാലമാണിത്. മേഖലയിൽ വൻതോതിലുള്ള സാമ്പത്തിക പുരോഗതി കൈവരിക്കാൻ പദ്ധതി മുതൽക്കൂട്ടാകുമെന്ന് മുഖ്യമന്ത്രി ഷിൻഡെ പറഞ്ഞു.
21.8 കിലോ മീറ്ററാണ് പാലത്തിന്റെ ദൂരം. ഇതിൽ 16.5 കിലോ മീറ്റർ ദൂരവും സമുദ്രത്തിന് മുകളിലൂടെയാണ്. 2018 മുതലാണ് പാലത്തിന്റെ നിർമ്മാണം ആരംഭിച്ചത്. 4.5 വർഷത്തിനുള്ളിൽ നിർമ്മാണം പൂർത്തിയാകുമെന്നാണ് പ്രതീക്ഷിച്ചിരുന്നതെങ്കിലും കൊറോണ മഹാമാരിയുടെ വ്യാപനം മൂലം താമസം നേരിടുകയായിരുന്നു. ജപ്പാൻ ഇന്റർനാഷണൽ കോർപ്പറേഷൻ ഏജൻസിയുടെ ധനസഹായത്താലാണ് പാലത്തിന്റെ നിർമ്മാണം പൂർത്തിയാക്കിയത്. വിദേശ രാജ്യങ്ങളിൽ കണ്ടുവരുന്ന ഓപ്പൺ ടോൾ സംവിധാനമായിരിക്കും ഏർപ്പെടുത്തുകയെന്നാണ് സൂചന. ഇതുപ്രകാരം ടോൾ നൽകാൻ വാഹനങ്ങൾ നിർത്തേണ്ട ആവശ്യമുണ്ടായിരിക്കില്ല.
