ന്യൂഡൽഹി: പ്രപഞ്ച രഹസ്യങ്ങൾ പഠിക്കാനായി ഭാരതം അയച്ച ഉപഗ്രഹം എക്സ്പോസാറ്റിന്റെ വിജയകരമായ വിക്ഷേപണത്തിൽ അഭിനന്ദനവുമായി പ്രധാനമന്ത്രി നരേന്ദ്രമോദി. പുതുവർഷത്തിന് ഒരു ഉജ്ജ്വല തുടക്കം സമ്മാനിച്ച ഭാരതത്തിന്റെ ശാസ്ത്രജ്ഞന്മാർക്ക് നന്ദി. എക്സ്പോസാറ്റിന്റെ വിക്ഷേപണം വിജയം ബഹിരാകാശ പഠന മേഖലയ്‌ക്ക് അദ്ഭുതകരമായ വാർത്തയാണെന്നായിരുന്നു അദ്ദേഹം കുറിച്ചത്. സമൂഹമാദ്ധ്യമത്തിൽ പങ്കുവെച്ച പോസ്റ്റിലാണ് അദ്ദേഹത്തിന്റെ വാക്കുകൾ.
20240-ന് ഒരു ഉജ്ജ്വല തുടക്കം സമ്മാനിച്ച ഭാരതത്തിന്റെ ശാസ്ത്രജ്ഞന്മാർക്ക് നന്ദി. എക്സ്പോസാറ്റിന്റെ വിക്ഷേപണം വിജയം ബഹിരാകാശ പഠന മേഖലയ്‌ക്ക് അദ്ഭുതവാർത്തയാണ്. മേഖലയിലെ ഇന്ത്യയുടെ ഉയർച്ചയ്‌ക്ക് വലിയ സാദ്ധ്യതയാണ് ഇത് വഴിതുറന്നിരിക്കുന്നത്. ഐഎസ്ആർഓയിലെ ശാസ്ത്രജ്ഞർക്കും ആഗോളതലത്തിൽ ഇന്ത്യയുടെ ഉയർച്ചയിൽ ഒപ്പം നിൽക്കുന്ന ബഹിരാകാശ കുട്ടായ്മയ്‌ക്കും എല്ലാവിധ ആശംസകളും നേരുന്നു. – പ്രധാനമന്ത്രി കുറിച്ചു.
പ്രപഞ്ച രഹസ്യങ്ങൾ തേടി ഇന്ത്യ അയച്ച ഉപഗ്രഹമാണ് എക്സ്പോസാറ്റ്. എക്സ്റേ തരംഗങ്ങളിലൂടെ തമോഗർത്തങ്ങളുടെയും ന്യൂട്രോൺ നക്ഷത്രങ്ങളുടെയും അടക്കം പഠനം നടത്തുകയാണ് എക്സ്പോസാറ്റ് ദൗത്യത്തിന്റെ ലക്ഷ്യം. അഞ്ചുവർഷം നീളുന്ന ദൗത്യം ഭൂമിയുടെ ഭ്രമണപഥത്തിൽ നിന്നുകൊണ്ട് തന്നെയാണ് എക്സ്പോസാറ്റ് നിർവ്വഹിക്കുന്നത്. ലോകത്തിലെ തന്നെ ഇത്തരത്തിലുള്ള രണ്ടാമത്തെ ദൗത്യമാണ് ഭാരതത്തിന്റെ എക്സ്പോസാറ്റ്. നാസ മാത്രമാണ് സമാനമായ തരത്തിൽ ഉപഗ്രഹം വിക്ഷേപിച്ചിട്ടുള്ളത്. 2021-ലായിരുന്നു ഇത്.
