മുംബൈ: രണ്ട് വർഷത്തേളമായി പ്രവർത്തിക്കാത്ത ബാങ്ക് അക്കൗണ്ടുകളിൽ ഇടപാട് നടന്നാൽ രഹസ്യാന്വേഷണം നടത്താൻ ആർബിഐയുടെ നിർദ്ദേശം. ഉടമകൾ അക്കൗണ്ടുകൾ വഴി ഇടപാടുകൾ നടത്തുകയാണെങ്കിൽ അത് ബാങ്കുകൾ നിരീക്ഷിക്കണമെന്നാണ് നിർദ്ദേശം. ബാങ്ക് ശാഖയിലെ ഉന്നത ഉദ്യോഗസ്ഥരാണ് നിരീക്ഷണം നടത്തേണ്ടത്. എന്നാൽ മറ്റ് ജീവനക്കാർ അറിയാതെ വേണം അന്വേഷണം നടത്തേണ്ടതെന്നും ആർബിഐ അറിയിച്ചു.
രണ്ട് വർഷമോ അതിൽ കൂടുതൽ കാലമോ ഇടപാടുകൾ നടത്താത്ത അക്കൗണ്ടുകളെ പ്രവർത്തനരഹിതമായാണ് കണക്കാക്കുന്നത്. അത്തരത്തിലുള്ള അക്കൗണ്ടുകൾ വഴി നിരവധി തട്ടിപ്പുകൾ ഇപ്പോൾ നടക്കുന്നുണ്ട്. ഇത് തടയുകയാണ് ആർബിഐയുടെ പ്രധാന ലക്ഷ്യം. ഇത്തരത്തിലുള്ള അക്കൗണ്ടുകൾ കൈകാര്യം ചെയ്യുന്നതിനുള്ള പുതുക്കിയ മാർഗരേഖ ഏപ്രിൽ ഒന്ന് മുതൽ എല്ലാ ബാങ്കുകളും പാലിക്കാനും നിർദ്ദേശം നൽകി.
ഉപയോഗിക്കാത്ത അക്കൗണ്ടുകൾ പ്രവർത്തനക്ഷമമാക്കാനുള്ള അപേക്ഷ ലഭിച്ചാൽ മൂന്ന് പ്രവർത്തി ദിവസത്തിനുള്ളിൽ അത് പരിഗണിക്കണം. ആക്ടിവേറ്റ് ചെയ്യാത്ത പക്ഷം അക്കൗണ്ടുകളിൽ നിന്നും പണം പിൻവലിക്കാൻ അനുവദിക്കരുത്. അക്കൗണ്ടുകൾ ആക്ടിവേറ്റ് ആക്കി കഴിഞ്ഞാൽ കുറച്ച് കാലത്തേക്ക് ഇടപാടുകൾ പരിമിതപ്പെടുത്താമെന്നും ആർബിഐയുടെ നിർദ്ദേശത്തിൽ പറയുന്നു.
