മലയാള സിനിമയിലെ അഭിനേതാക്കൾക്ക് വേണ്ടി പ്രവർത്തിക്കുന്ന സംഘടനയാണ് അമ്മ. സംഘടനയുടെ നേതൃസ്ഥാനത്തുള്ള താരമാണ് ഇടവേള ബാബു. താരത്തിന് ഇപ്പോൾ സിനിമ കുറവാണെങ്കിലും മുഴുവൻ സമയവും അമ്മയിലാണ് ചിലവഴിക്കുന്നത്. അതിനാൽ തന്നെ ഇടവേള ബാബുവിന് അമ്മയിൽ നിന്നും ശമ്പളം ലഭിക്കുമോ എന്ന സംശയം നിരവധി പേർക്കുണ്ട്.
തന്റെ ശമ്പളവുമായി ബന്ധപ്പെട്ട സംശയത്തിന് മറുപടി നൽകുകയാണ് ഇടവേള ബാബു. ഒരു അഭിമുഖത്തിനിടയിലായിരുന്നു അമ്മയിൽ നിന്നും താൻ ശമ്പളം കൈപ്പറ്റുന്നുണ്ടോ എന്നും ആ സംഘടനയെ എങ്ങനെയാണ് താൻ കാണുന്നതെന്നും ഇടവേള ബാബു പറഞ്ഞത്.
‘ഒരു പൊതുയോഗത്തിൽ ജഗതി ചേട്ടനാണ് പറഞ്ഞത് ഇതൊരു ഊറ്റിയെടുക്കലാണ് ബാബുവിന് ശമ്പളം നൽകണം. എല്ലാവരും ശരിയാണെന്നും പറഞ്ഞു. യോഗം കഴിയാറായപ്പോൾ മീറ്റിംഗിൽ ഞാൻ ചോദിച്ചു എനിക്ക് ശമ്പളമായി നിങ്ങൾ എന്താണ് നൽകുന്നതെന്ന്. ഞാൻ ചെയ്യുന്ന സേവനത്തിന് എന്താണ് നിങ്ങൾ വിലയിടുന്നതെന്നും ചോദിച്ചു. അതിന് ഉത്തരം തരാനും ആർക്കും സാധിച്ചില്ല. അമ്മ എന്ന സംഘടന ഒരു ചാരിറ്റിയാണ്. ശമ്പളം എടുക്കാൻ മെമ്പർക്ക് പറ്റില്ല. ഒരു ജോലിക്കാരനാണെങ്കിൽ സാധിക്കും. അല്ലെങ്കിൽ ഞാൻ രാജി വച്ചതിന് ശേഷം അമ്മയിൽ ജോലിക്കാരനായി ചേരണം, എങ്കിൽ സാധിക്കും.
ട്രാവലിംഗിന്റെ എക്സ്പൻസ് ഞാൻ എഴുതി എടുക്കാറുണ്ട്. പക്ഷേ, ഇപ്പോൾ എറണാകുളത്താണ് അമ്മയുടെ ഓഫീസ് ഞാൻ അവിടെ തന്നെയാണ് താമസിക്കുന്നത്. ഞാൻ ശമ്പളത്തെക്കുറിച്ച് ചിന്തിക്കാറില്ല. അമ്മയുടെ ഓഫീസിൽ നിന്നും ആകെ ഒരു കട്ടൻചായ മാത്രമാണ് കുടിക്കുന്നത്. ബാക്കി എല്ലാത്തിനും എന്റെ പോക്കറ്റിൽ നിന്നുമാണ് പൈസ എടുക്കുന്നത്. ഇത് പൊതുജനങ്ങളെ അറിയിക്കണമെന്ന് തോന്നിയിട്ടില്ല. നമ്മുടെ അംഗങ്ങൾക്ക് പോലും വ്യക്തമായി ഇക്കാര്യം അറിയില്ല.’- ഇടവേള ബാബു പറഞ്ഞു.
