ബ്ലാക്ക് ആൻഡ് വൈറ്റ് തീമിലാണ് ഹൊറർ ത്രില്ലറായ ഭ്രമയുഗത്തിന്റെഓരോ പോസ്റ്ററും അണിയറ പ്രവർത്തർ സമൂഹമാദ്ധ്യമങ്ങൾ വഴി പുറത്തുവിട്ടത്. പുതുവത്സര ദിനത്തിലായിരുന്നു അത്യുഗ്രൻ ഗെറ്റപ്പിലുള്ള മമ്മൂട്ടിയുടെ ഫസ്റ്റ് ലുക്ക് പോസ്റ്റർ പങ്കുവച്ചത്. പിന്നാലെ, അർജുൻ അശോകന്റെയും സിദ്ധാർത്ഥ് ഭരതന്റേയും പോസ്റ്ററും അണിയറപ്രവർത്തകർ പുറത്ത് വിട്ടിരുന്നു. ഇപ്പോഴിതാ, ചിത്രത്തിലെ ഒരു സ്ത്രീ കഥാപാത്രത്തിന്റെ ചിത്രമാണ് മമ്മൂട്ടി പങ്കുവച്ചിരിക്കുന്നത്.
നടിയും മോഡലുമായ അമാല്ഡ ലിസിനാണ് ചിത്രത്തിലുള്ളത്. അരയിലും കാലിലും കയ്യിലും നിരവധി ആഭരണങ്ങളുമായി അർദ്ധ നഗ്നയായിട്ടാണ് അമാൽഡ ഫസ്റ്റ് ലുക്ക് പോസ്റ്ററിലുള്ളത്. പോസ്റ്റിൽ താരത്തിന്റെ മുഖവും വ്യക്തമാകാത്ത രീതിയിലാണ്. ‘കമ്മട്ടിപ്പാടം’ സിനിമയിലൂടെ ശ്രദ്ധ നേടിയ താരമാണ് അമാല്ഡ ലിസ്. ‘ട്രാന്സ്’, ‘സി യു സൂണ്’, ‘സുലൈഖ മന്സില്’ എന്നീ ചിത്രങ്ങളിലും അമാൽഡ അഭിനയിച്ചിരുന്നു.
രാഹുൽ സദാശിവൻ രചനയും സംവിധാനവും നിർവഹിക്കുന്ന ചിത്രത്തിന്റെ പോസ്റ്റ് പ്രൊഡക്ഷൻ വർക്കുകൾ പുരോഗമിക്കുകയാണ്. മലയാളം, തമിഴ്, തെലുങ്ക്, കന്നഡ, ഹിന്ദി എന്നീ ഭാഷകളിലായി പുറത്തിറങ്ങുന്ന ചിത്രം ഈ വർഷം തീയേറ്ററുകളിൽ എത്തും. ടി.ഡി രാമകൃഷ്ണന്റെതാണ് സംഭാഷണങ്ങൾ. ഭൂതകാലം എന്ന ചിത്രത്തിനുശേഷം രാഹുൽ സദാശിവൻ ഒരുക്കുന്ന ചിത്രമാണ് ഭ്രമയുഗം.
