വയനാട്: സുൽത്താൻ ബത്തേരിയിൽ സ്കൂൾ ബസിന് നേരെ കുരങ്ങിന്റെ ആക്രമണം. സംഭവത്തിൽ ബസിലുണ്ടായിരുന്ന വിദ്യാർത്ഥികൾക്കും ഡ്രൈവർക്കും പരിക്കേറ്റു. ബത്തേരി ഐഡിയൽ ഇംഗ്ലീഷ് മീഡിയം സ്കൂളിലെ നാല് വിദ്യാർത്ഥികൾക്കാണ് പരിക്കേറ്റത്. ഇവരെ ബത്തേരിയിലെ സ്വകാര്യ ആശുപത്രിയിലും മീനങ്ങാടിയിലെ സ്വകാര്യ ആശുപത്രിയിലും പ്രവേശിപ്പിച്ചു.
കഴിഞ്ഞ ദിവസം വൈകിട്ട് കൃഷ്ണഗിരി മലന്തോട്ടത്തെ പാണ്ട ഫുഡ്സ് ഫാക്ടറിക്ക് മുന്നിൽ വച്ചായിരുന്നു സംഭവം. സമീപത്തെ തെങ്ങിൽ നിന്നും പറിച്ച തേങ്ങ കുരങ്ങ് ഓടിക്കൊണ്ടിരിക്കുന്ന ബസിന് മുകളിലേക്ക് എറിയുകയായിരുന്നു. ഇത് ബസിന്റെ മുൻവശത്തെ ചില്ലിൽ പതിച്ചു. പൊട്ടിയ ചില്ല് തട്ടിയാണ് കുട്ടികൾക്ക് പരിക്കേറ്റത്.
