നമുക്കു ചുറ്റും ഒന്നു കണ്ണോടിച്ചാൽ പ്ലാസ്റ്റിക് മാലിന്യങ്ങൾ കുന്നുകൂടി കിടക്കുന്നതായിരിക്കും പലപ്പോഴും കാണാൻ സാധിക്കുന്നത്. പ്ലാസ്റ്റിക് മാലിന്യങ്ങൾ ഭൂമിയിൽ കൂമ്പാരങ്ങളായി മാറുമ്പോൾ വലിയ വിപത്താണ് മനുഷ്യരെ കാത്തിരിക്കുന്നത്. ഇതിൽ നിന്നും മോചനം തേടുന്ന ലോകത്തിനായി പുത്തൻ സാങ്കേതികവിദ്യ ഒരുക്കിയിരിക്കുകയാണ് മുകേഷ് അംബാനിയുടെ റിലയൻസ് ഇൻഡസ്ട്രീസ്.
ഉപയോഗ ശേഷം വലിച്ചെറിയുന്ന പ്ലാസ്റ്റിക്കുകളിൽ നിന്നും പുതിയ ഉത്പന്നങ്ങളും പെറോലിസിസ് എണ്ണയും നിർമ്മിച്ചെടുക്കുന്ന സാങ്കേതികവിദ്യായാണ് റിലയൻസ് ഇൻഡസ്ട്രീസ് വികസിപ്പിച്ചിരിക്കുന്നത്. ഗുജറാത്തിലെ ജാം നഗർ റിഫൈനറിയിലാണ് പുത്തൻ സാങ്കേതികവിദ്യയ്ക്ക് തുടക്കം കുറിച്ചിരിക്കുന്നത്. പരിസ്ഥിതി മലിനീകരണം കുറയ്ക്കുക എന്ന ലക്ഷ്യത്തോടെയാണ് ഉപയോഗശൂന്യമായ പ്ലാസ്റ്റിക്കുകളിൽ നിന്നും വീണ്ടും ഉത്പന്നങ്ങൾ നിർമ്മിക്കുന്നതിനായി ഈ സാങ്കേതികവിദ്യ റിലയൻസ് വികസിപ്പിച്ചെടുത്തിരിക്കുന്നത്. പെറോലിലിസ് എണ്ണ ഉപയോഗിച്ച് പോളിമെറുകൾ വികസിപ്പിച്ചെടുക്കാനും സാങ്കേതികവിദ്യയ്ക്ക് സാധിച്ചിട്ടുണ്ട്. അന്താരാഷ്ട്ര സുസ്ഥിര കാർബൺ സർട്ടിഫിക്കേഷൻ ഇപ്പോൾ വികസിപ്പിച്ചെടുത്തിരിക്കുന്ന പോളിമെറുകൾക്ക് ലഭിച്ചിട്ടുണ്ട്. ഭാവിയിൽ വൻ തോതിൽ പ്ലാസ്റ്റിക്കിന്റെ ഉപയോഗം കുറയ്ക്കാൻ ഇതുവഴി സാധിക്കുമെന്ന് റിലയൻസ് വ്യക്തമാക്കി.