ന്യൂയോർക്ക്: യുഎസ് പ്രസിഡന്റ് തിരഞ്ഞെടുപ്പിൽ വിലക്ക് ഏർപ്പെടുത്തിക്കൊണ്ടുള്ള കൊളറാഡോ പരമോന്നത കോടതിയുടെ വിധിക്കെതിരെ ഡൊണാൾഡ് ട്രംപിന്റെ അപ്പീലിൽ വാദം കേൾക്കാൻ അനുമതി നൽകി യുഎസ് സുപ്രീം കോടതി. ഫെബ്രുവരി എട്ടിനായിരിക്കും കേസിൽ വാദം കേൾക്കുന്നത്. 2021 ജനുവരി ആറിന് യുഎസ് ക്യാപിറ്റോളിന് നേരെ നടന്ന ആക്രമണത്തിൽ ട്രംപിന് പങ്കുണ്ടെന്ന് ചൂണ്ടിക്കാട്ടിയാണ് ട്രംപിന് തിരഞ്ഞെടുപ്പിൽ മത്സരിക്കുന്നതിന് കോടതി വിലക്കേർപ്പെടുത്തിയത്.
2024ലെ പ്രസിഡന്റ് തിരഞ്ഞെടുപ്പിൽ വീണ്ടും മത്സരിക്കാനൊരുങ്ങുവെയാണ് ട്രംപിന് കോടതിയിൽ നിന്ന് തിരിച്ചടി നേരിടുന്നത്. വിധിക്കെതിരെ കഴിഞ്ഞയാഴ്ചയാണ് ട്രംപ് അപ്പീൽ സമർപ്പിച്ചത്. കോടതി വിധി പുറപ്പെടുവിച്ച മെയിൻ സ്റ്റേറ്റ് സെക്രട്ടറി ഷെന്ന ബെല്ലോസിന്റെ വിധി തള്ളിക്കളയണമെന്നും ട്രംപിന്റെ അഭിഭാഷകർ മെയ്ൻ സുപ്പീരിയർ കോടതിയോട് അഭ്യർത്ഥിച്ചു. പക്ഷപാതപരമായ തീരുമാനമാണ് ഷെന്ന ബെല്ലോസ് എടുത്തതെന്നും അഭിഭാഷകർ ആരോപിക്കുന്നു.
കലാപത്തിലോ അക്രമത്തിലോ ഏർപ്പെടുന്ന ഉദ്യോഗസ്ഥരെ അധികാര സ്ഥാനങ്ങൾ വഹിക്കുന്നതിൽ നിന്ന് വിലക്കുന്ന യുഎസ് ഭരണഘടനയുടെ വ്യവസ്ഥ പ്രകാരമാണ് ട്രംപിന് വിലക്ക് ഏർപ്പെടുത്തിയത്. അമേരിക്കയുടെ ചരിത്രത്തിൽ ആദ്യമായാണ് അക്രമത്തിൽ ഉൾപ്പെട്ടതിന്റെ പേരിൽ ഒരു പ്രസിഡന്റ് സ്ഥാനാർത്ഥി അയോഗ്യനാക്കപ്പെടുന്നത്. യുഎസ് ക്യാപിറ്റോളിന് നേരെയുണ്ടായ ആക്രമണം അന്ന് സ്ഥാനം നഷ്ടപ്പെട്ട ട്രംപിന്റെ അറിവോടെയും പിന്തുണയോടെയുമാണ് സംഭവിച്ചതെന്നാണ് ഷെന്ന ബെല്ലോസ് ചൂണ്ടിക്കാട്ടിയത്.
