ഹൊറർ തീമിൽ വരുന്ന മമ്മൂട്ടിയുടെ ഏറ്റവും പുതിയ ചിത്രമാണ് ഭ്രമയുഗം. ചിത്രത്തിന്റെ പോസ്റ്റർ ജനുവരി ഒന്നിനായിരുന്നു പുറത്ത് വിട്ടത്. ബ്ലാക്ക് ആൻഡ് വൈറ്റ് തീമിൽ വേറിട്ട ലുക്കിലുള്ള മമ്മൂട്ടിയുടെ പോസ്റ്ററിന് വൻ സ്വീകാര്യതയാണ് ലഭിച്ചുകൊണ്ടിരിക്കുന്നത്. ഇത്രയും ഗംഭീരമായൊരു ഗെറ്റപ്പ് മമ്മൂട്ടിക്ക് ചെയ്ത് നൽകിയത് സംസ്ഥാന അവാര്ഡ് ജേതാവ് കൂടിയായ റോണക്സ് സേവ്യറാണ്. ആ ലുക്കിനെക്കുറിച്ച് വിവരിക്കുകയാണ് മേക്കപ്പ് ആർട്ടിസ്റ്റ് റോണക്സ് സേവ്യർ.
‘സിനിമയിൽ മമ്മൂക്കയുടേത് ഭയങ്കര സ്പെഷ്യലായ കഥാപാത്രമാണ്. ആ വേഷവും അദ്ദേഹത്തിന് അത്രയും ഇഷ്ടപ്പെട്ടിരുന്നു. അതുകൊണ്ടാണ് ചെയ്യാൻ തീരുമാനിച്ചത്. മമ്മൂക്കയുടെ ഇപ്പോഴത്തെ ലുക്ക് വച്ച് കൊടുക്കാന് പറ്റുന്ന ഗെറ്റപ്പ് എന്താണെന്നായിരുന്നു നോക്കിയത്. നാച്ചുറലായ ലുക്ക് ആണ് നല്കാന് ശ്രമിച്ചതും.
ആ കഥാപാത്രത്തിനുവേണ്ടി എക്സട്രാ ഒരുപല്ല് വെച്ചിട്ടുണ്ട്. അതെല്ലാം അവസാന ചർച്ചയിലെ കണ്ടെത്തലുകളാണ്. ഇങ്ങനത്തെയൊരു പ്ലാൻ ഞാൻ പറഞ്ഞപ്പോൾ സംവിധായകനും ഓക്കെ ആയിരുന്നു. അങ്ങനെ മമ്മൂക്കയെ വിളിച്ച് ഞാൻ അത് പരീക്ഷിച്ചു നോക്കിയത്. മമ്മൂക്ക ഭയങ്കര സപ്പോര്ട്ട് ആയിരുന്നു. അതിനായി അദ്ദേഹം ഒരു വലിയ പ്ലാന് തന്നെ ഉണ്ടാക്കിയിരുന്നു. ഒരു സിനിമയില് എന്ത് ലുക്കാണ് വേണ്ടതെന്നും അദ്ദേഹത്തിനും വ്യക്തമായ ധാരണയുണ്ട്. ഒരു കഥാപാത്രം ചെയ്യാന് തയാറായാല് ലുക്കിനെ കുറിച്ച് അദ്ദേഹം സംസാരിക്കാറുണ്ട്.’- റോണക്സ് സേവ്യർ പറഞ്ഞു.
