‘ഇതുപോലുള്ള സംഭവങ്ങൾ വേദനിപ്പിക്കുകയും ഭയപ്പെടുത്തുകയും ചെയ്യുന്നു’; ആരാധന പ്രകടിപ്പിക്കേണ്ടത് ഇങ്ങനെയല്ല; പൊട്ടിത്തെറിച്ച് യഷ്

ബെംഗളൂരു: തെന്നിന്ത്യൻ സൂപ്പർസ്റ്റാർ യഷിന്റെ ജന്മദിനത്തിൽ പോസ്റ്റിൽ ബാനർ കെട്ടാൻ കയറിയ മൂന്ന് പേർ ഷോക്കേറ്റ് മരിച്ച സംഭവത്തിൽ ദു:ഖം രേഖപ്പെടുത്തി നടൻ യഷ്. തന്നോടുള്ള ആരാധന അപകടങ്ങൾ വരുത്തി വയ്‌ക്കുന്ന രീതിയിൽ പ്രകടിപ്പിക്കരുതെന്ന് സമൂഹമാദ്ധ്യമമായ എക്‌സിലൂടെ അദ്ദേഹം അഭ്യർത്ഥിച്ചു. പരിക്കേറ്റ് ചികിത്സയിൽ കഴിയുന്ന ആരാധകരെയും അദ്ദേഹം നേരിട്ടെത്തി സന്ദർശിച്ചിരുന്നു.

” കഴിഞ്ഞ ദിവസമുണ്ടായ ദാരുണ സംഭവത്തിൽ മരിച്ചവരുടെ കുടുംബാംഗങ്ങളുടെ ദു:ഖത്തിൽ പങ്കുചേരുന്നു. നിങ്ങൾ എവിടെയിരുന്നാലും, എന്നെ ഹൃദയത്തോട് ചേർത്തു നിർത്തുന്നതു തന്നെയാണ് വലിയ കാര്യം. എന്നാൽ തന്നോടുള്ള ആരാധന ഇത്തരം രീതിയിൽ പ്രകടിപ്പിക്കരുത്. ഇതുപോലുള്ള ദാരുണ സംഭവങ്ങൾ വളരെയധികം വേദനിപ്പിക്കുകയും ഭയപ്പെടുത്തുകയും ചെയ്യുന്നു. പരിക്കേറ്റ് കഴിയുന്നവർ എത്രയും വേഗം സുഖം പ്രാപിച്ച് വരട്ടെ”- യഷ് പറഞ്ഞു.

Hope hospitalised fans recover soon 🥺🙏🏻#Yash #Gadag #ToxicTheMovie pic.twitter.com/fIxsoNgoND

— 𝗦𝗵𝗿𝗲𝘆𝗶 ᵀᵒˣᶦᶜ (@NameIsShreyash) January 8, 2024

കഴിഞ്ഞ ദിവസമാണ് യഷിന്റെ പിറന്നാൾ ദിനത്തോടനുബന്ധിച്ച് 25 അടിയോളം ഉയരമുള്ള കട്ടൗട്ട് സ്ഥാപിക്കുന്നിടെ മൂന്ന് പേർ ഷോക്കേറ്റ് മരണപ്പെട്ടത്. കർണാടകയിലെ സുരനാഗി സ്വദേശികളായ ഹനുമന്ത് ഹരിജൻ, മുരളി നടുവിനാമണി, നവീൻ ഗാജി എന്നീ യുവാക്കളാണ് മരണമടഞ്ഞത്. സംഭവത്തിനു പിന്നാലെ മരണപ്പെട്ടവരുടെ വീട്ടിലെത്തി താരം ബന്ധുക്കളെ കാണുകയും ആശ്വസിപ്പിക്കുകയും ചെയ്തിരുന്നു.