ചുവന്നുതുടുത്ത സ്‌ട്രോബറി കഴിക്കാൻ ഇഷ്ടമില്ലാത്തവർ കുറവാണ്. നല്ല രുചിക്കു പുറമേ ആരോഗ്യദായകവുമാണ് സ്‌ട്രോബറി. വൈറ്റമിൻ സി, മാംഗനീസ്, പൊട്ടാസ്യം, വൈറ്റമിൻ ബി എന്നിവ ഇതിൽ അടങ്ങിയിട്ടുണ്ട്. എന്നാൽ ശരിയായ രീതിയിൽ തിരഞ്ഞെടുക്കുകയും, ശരിയായ വിധം സൂക്ഷിക്കുകയും, ഉപയോഗിക്കുകയും ചെയ്‌തെങ്കിൽ മാത്രമേ ഗുണങ്ങൾ ഒട്ടുമേ ചോരാതെ സ്‌ട്രോബറി കഴിക്കാൻ സാധിക്കൂ..
സ്‌ട്രോബറി വാങ്ങുമ്പോഴും കഴിക്കുമ്പോഴും ശ്രദ്ധിക്കേണ്ട കാര്യങ്ങളിതാ..
സീസൺ
വിവിധ സൂപ്പർമാർക്കറ്റുകളിൽ നിന്നും മറ്റുമായി വർഷം മുഴുവൻ നമുക്ക് സ്‌ട്രോബറി ലഭിക്കും. എന്നാൽ ഇവ സീസണിൽ വാങ്ങുന്നതാണ് ഉചിതം. ശൈത്യകാലമാണ് സ്്‌ട്രോബറിയുടെ സീസൺ. ഈ സമയത്തായിരിക്കും ഏറ്റവും നല്ല സ്‌ട്രോബറികൾ ലഭിക്കുക.
മണം
സ്‌ട്രോബറി തിരെഞ്ഞെടുക്കുമ്പോൾ അവയുടെ ഗന്ധം ശ്രദ്ധിക്കുക. നല്ല ഫ്രഷ് സ്‌മെൽ നൽകുന്നുണ്ടെങ്കിൽ കൊള്ളാവുന്ന സ്‌ട്രോബറിയായിരിക്കും. അരോചകമായ ഗന്ധമാണെങ്കിൽ വാങ്ങാതിരിക്കുക.
പുറംതോട്
നല്ല സ്‌ട്രോബറിയുടെ പുറംതൊലി വളരെ കടുപ്പമുള്ളതും ചുവന്ന നിറത്തിലുള്ളതും പൂപ്പലും ചതവും ഇല്ലാത്തതുമായിരിക്കും. പച്ച നിറത്തിലുള്ള സ്‌ട്രോബറി വാങ്ങാതിരിക്കുക.
ശരിയായ വലുപ്പം
ഇടത്തരം വലുപ്പത്തിലുള്ള സ്‌ട്രോബറി വേണം വാങ്ങാൻ. അവ കൂടുതൽ രുചികരവും ജ്യൂസിയും ആയിരിക്കും. എന്നാൽ വലുപ്പമുള്ള സ്‌ട്രോബറിയുടെ അകം ചിലപ്പോൾ പൊള്ളയായിരിക്കും. മാത്രവുമല്ല വെള്ളത്തിന്റെ അളവ് കൂടുതൽ ആയിരിക്കും.
സ്‌ട്രോബറി സൂക്ഷിക്കേണ്ടത് എങ്ങനെ..
സ്‌ട്രോബറി കഴുകിയാൽ അപ്പോൾ തന്നെ കഴിക്കണം. വെള്ളത്തിൽ കുതിർത്ത് വച്ചാൽ ഇത് മൃദുവാകുന്നു. പിന്നീട് ഇവ എടുത്തുവച്ചാൽ ചീഞ്ഞുപോകാൻ സാധ്യതയുണ്ട്. വാങ്ങിയ സ്‌ട്രോബറി അന്നേദിവസം തന്നെ കഴിക്കാൻ ഉദ്ദേശിക്കുന്നില്ലെങ്കിൽ അവ ഫ്രിഡ്ജിൽ സൂക്ഷിക്കുക. ഇവ പേപ്പർ ടൗവ്വലിൽ പൊതിഞ്ഞു വേണം സൂക്ഷിക്കാൻ. അല്ലെങ്കിൽ ജലാംശം മൂലം കേടുപാട് സംഭവിക്കാം..
