സർപ്രൈസ് തിളക്കമായി മാറിയിരിക്കുകയാണ് തേജ സജ്ജ നായകനായെത്തിയ ചിത്രം ഹനുമാൻ. ചെറിയ ബജറ്റില് ഒരുങ്ങിയ ഒരു ചിത്രമായിട്ടും ആഗോള ബോക്സ് ഓഫീസില് മികച്ച കളക്ഷൻ നേടാൻ ഹനുമാന് കഴിയുന്നെണ്ടെന്നാണ് അനലിസ്റ്റുകളുടെ റിപ്പോർട്ട്. 12 ഭാഷകളിലായുള്ള ഹനുമാന്റെ നെറ്റ് കളക്ഷനാണ് പ്രമുഖ ട്രേഡ് അനലിസ്റ്റുകളായ സാക്നിൽക് പുറത്ത് വിട്ടിരിക്കുന്നത്.
ആഗോള തലത്തിൽ ഹനുമാൻ 32.8 കോടി രൂപയാണ് നേടിയെതെന്നാണ് ബോക്സോഫീസ് റിപ്പോർട്ടിൽ പറയുന്നത്. ആഗോള ബോക്സ് ഓഫീസില് 100 കോടി രൂപയില് അധികം ഹനുമാൻ നേടാനും സാധ്യതയുണ്ട്.
ഭഗവാൻ ഹനുമാന്റെ ശക്തി ലഭിക്കുന്ന അതിമാനുഷികനായ ഒരു യുവാവിന്റെ കഥയാണ് സിനിമയിൽ പറയുന്നത്. കൽക്കി, സോംബി റെഡ്ഡി തുടങ്ങിയ ചിത്രങ്ങളിലൂടെ പ്രേക്ഷകപ്രീതി പിടിച്ചുപറ്റിയ തെലുങ്ക് സംവിധായകനാണ് പ്രശാന്ത് വർമ്മ. ചിത്രത്തിന്റെ തിരക്കഥ രചിച്ചിരിക്കുന്നതും പ്രശാന്ത് വർമ്മ തന്നെയാണ്. പ്രശാന്ത് വർമ്മ സിനിമാറ്റിക് യൂണിവേഴ്സിലെ ആദ്യ സിനിമയാണ് ഹനുമാൻ. അമൃത അയ്യറാണ് ചിത്രത്തിൽ നായിക.പ്രൈംഷോ എന്റർടെയ്ൻമെന്റിന്റെ ബാനറിൽ കെ. നിരഞ്ജൻ റെഡ്ഡിയാണ് ഈ ബ്രഹ്മാണ്ഡ ചിത്രം നിർമ്മിച്ചത്. വരലക്ഷ്മി ശരത്കുമാർ, വിനയ് റായ്, സത്യാ, രാജ് ദീപക് ഷെട്ടി തുടങ്ങിയ താരങ്ങളും ചിത്രത്തിൽ അണിനിരക്കുന്നു. ശിവേന്ദ്രയാണ് ചിത്രത്തിന്റെ ഛായാഗ്രാഹകൻ.
