ന്യൂഡൽഹി: പിഎം ജൻമൻ പദ്ധതിയുടെ ഗുണഭോക്താക്കളുമായി സംവദിച്ച് പ്രധാനമന്ത്രി നരേന്ദ്രമോദി. എൽപിജി സിലിണ്ടർ ലഭിച്ചതോടെ ജീവിതത്തിൽ എന്തെല്ലാം മാറ്റങ്ങളുണ്ടായെന്ന് ഗുണഭോക്താക്കളായ സ്ത്രീകളോട് പ്രധാനമന്ത്രി ചോദിച്ചു.
മണ്ണടുപ്പിൽ പാകം ചെയ്യാൻ ബുദ്ധിമുട്ടുള്ള പലതും ഇപ്പോൾ എളുപ്പത്തിൽ പാകം ചെയ്യാൻ തുടങ്ങി കാണുമല്ലേയെന്നും എന്തൊക്കെ വിഭവങ്ങളാണ് നിങ്ങൾ പുതിയതായി പാകം ചെയ്യാൻ പഠിച്ചതെന്നുമായിരുന്നു വനിതകളോട് പ്രധാനമന്ത്രി ചോദിച്ചത്. രുചി നോക്കാൻ ഞാൻ വരുമെന്ന് കരുതി ആശങ്കപ്പെടേണ്ട, ധൈര്യമായി പറഞ്ഞോളൂവെന്നും അദ്ദേഹം തമാശരൂപേണ സ്ത്രീകളോട് പറഞ്ഞു. പാചകവാതകവും, വൈദ്യുതിയും, കുടിവെള്ളവും വീടുമൊക്കെ ലഭിച്ചതോടെ ജീവിതത്തിലുണ്ടായ പരിവർത്തനത്തെക്കുറിച്ച് സ്ത്രീകൾ പ്രധാനമന്ത്രിയുമായി പങ്കുവച്ചു.
പ്രധാനമന്ത്രി ആവാസ് യോജനയുടെ (PMAY-G) ഒരു ലക്ഷം ഗുണഭോക്താക്കൾക്ക് പിഎം ജൻജതി ആദിവാസി ന്യായ മഹാ അഭിയാൻ (PM-JANMAN) പദ്ധതിയുടെ കീഴിലാണ് ആദ്യ ഗഡു കൈമാറിയത്. 540 കോടി രൂപയുടെ ആദ്യ ഗഡുവായിരുന്നു ഇന്ന് ഗുണഭോക്താക്കൾക്ക് വിതരണം ചെയ്തത്.
ഏറ്റവും പിന്നാക്കം നിൽക്കുന്ന വനവാസി സഹോദരങ്ങളിലേക്ക് സർക്കാരിന്റെ ക്ഷേമപദ്ധതികൾ എത്തണമെന്നതാണ് പിഎം ജൻമൻ മഹാ അഭിയാന്റെ ലക്ഷ്യമെന്നും ക്ഷേമപദ്ധതികളിൽ നിന്ന് ഒരാൾ പോലും വിട്ടുപോകില്ലെന്ന് കേന്ദ്രസർക്കാർ ഉറപ്പുവരുത്തുമെന്നും പ്രധാനമന്ത്രി അറിയിച്ചു.
