ചെന്നൈ: അയോദ്ധ്യ പ്രാണപ്രതിഷ്ഠാ ചടങ്ങിനോടനുബന്ധിച്ച് വീടുകളിൽ എല്ലാ ഭക്തരും വിളക്ക് തെളിയിക്കണമെന്ന് പറഞ്ഞ ഗായിക കെ.എസ് ചിത്രയ്ക്കെതിരെ സമൂഹമാദ്ധ്യമങ്ങളിൽ വ്യാപകമായ ആക്രമണമാണ് നടക്കുന്നത്. ഇതിനെ തുടർന്ന് ചിത്രയെ പിന്തുണച്ച് നിരവധി പേർ രംഗത്ത് എത്തുകയും ചെയ്തു. ഇപ്പോഴിതാ, ചിത്രയ്ക്ക് പിന്തുണയുമായി എത്തിയിരിക്കുകയാണ് ദേശീയ വനിതാ കമ്മീഷൻ അംഗവും നടിയുമായ ഖുശ്ബു.
ചിത്രയ്ക്കെതിരെ നടക്കുന്ന സൈബർ ആക്രമണം ലജ്ജാകരമാണെന്നാണ് ഖുശ്ബു പറഞ്ഞത്. കോൺഗ്രസും കമ്യൂണിസ്റ്റും ഭരിക്കുന്ന കേരളത്തിൽ കൊടിയ അസഹിഷ്ണുതയാണ് നടക്കുന്നത്. മറ്റൊരാളുടെ വിശ്വാസത്തെ അംഗീകരിക്കാൻ അവർക്ക് കഴിയില്ലെന്നും ഖുശ്ബു പറഞ്ഞു.
അയോദ്ധ്യയിൽ പ്രതിഷ്ഠ നടക്കുന്ന ജനുവരി 22-ന് ഉച്ചയ്ക്ക് 12.20ന് ശ്രീരാമ ജയരാമ ജയജയരാമ എന്ന രാമമന്ത്രം ജപിച്ചുകൊണ്ടിരിക്കണമെന്നായിരുന്നു ചിത്ര വീഡിയോയിലൂടെ പറഞ്ഞത്. അതുപോലെ വൈകുന്നേരം അഞ്ച് തിരിയുള്ള വിളക്ക് വീടിന്റെ നാനഭാഗത്തും തെളിയിക്കണം. ഭഗവാന്റെ അനുഗ്രഹം എല്ലാവർക്കും ഉണ്ടാകട്ടെന്നുമാണ് ചിത്ര പറഞ്ഞത്.