ബേസിൽ ജോസഫിന്റെ സംവിധാനത്തിൽ രണ്‍വീര്‍ സിംഗ് നായകനാകുന്ന ‘ശക്തിമാന്‍’ എന്ന ചിത്രം നിർത്തിവെച്ചതായി വാർത്തകൾ പുറത്ത് വന്നിരുന്നു. ഏകദേശം 550 കോടി ബജറ്റിൽ ഇറങ്ങുന്ന ചിത്രം വിജയിച്ചില്ലെങ്കിൽ വൻ നഷ്ടത്തിലാകുമെന്ന വിലയിരുത്തലിനെ തുടർന്നാണ് സോണി ചിത്രം ഉപേക്ഷിച്ചെന്നായിരുന്ന വാർത്തകൾ.
വിഷയം വൻ ചർച്ചയായതിന് പിന്നാലെ മറുപടിയുമായി എത്തിയിരിക്കുകയാണ് സോണി പിക്‌ചേഴ്‌സിന്റെ ജനറല്‍ മാനേജറും ഹെഡുമായ ലാഡ സിംഗ്. പ്രചരിക്കുന്ന വാർത്ത തെറ്റാണെന്നും ശക്തിമാന്‍ പ്രോജക്ട് ഓണ്‍ ആണെന്നുമാണ് ലാഡ സിംഗ് സമൂഹമാദ്ധ്യമത്തിലൂടെ അറിയിച്ചിരിക്കുന്നത്.
തൊണ്ണൂറകളിൽ മിനിസ്ക്രീനിലെ ഹിറ്റ് പരമ്പരയായിരുന്നു ശക്തിമാൻ. സിനിമ ബിഗ് സ്ക്രീനിലേക്ക് വീണ്ടുമെത്തുന്നത് സിനിമാ പ്രേക്ഷകർക്കിടയിൽ വൻ ചർച്ചയായി മാറിയിരുന്നു. ബേസില്‍ ജോസഫിന്റെ ബോളിവുഡ് അരങ്ങേറ്റം കൂടിയാകും ഈ ചിത്രം. രവി വര്‍മനാണ് സിനിമയുടെ ഛായാഗ്രാഹകന്‍.
ദൂരദര്‍ശനില്‍ സംപ്രേഷണം ചെയ്ത ശക്തിമാനില്‍ മുകേഷ് ഖന്നയായിരുന്നു നായകന്‍. 450 എപ്പിസോഡുകളായി പുറത്തിറങ്ങിയ ശക്തിമാന്‍ വന്‍ വിജയമായിരുന്നു. തൊണ്ണൂറുകളില്‍ ആരാധകര്‍ ഏറ്റെടുത്ത അമാനുഷിക നായകന്‍ സ്ക്രീനിലേക്ക് എത്തുന്നതിനായാണ് ആരാധകര്‍ കാത്തിരിക്കുന്നത്.
