ലോകമൊന്നടങ്കം അയോദ്ധ്യയുടെ മണ്ണിലെത്താൻ തീവ്രമായി ആഗ്രഹിക്കുന്നു. യാത്രയ്‌ക്കിറങ്ങും മുൻപ് എല്ലാവർക്കുമുള്ള ആശങ്കയാണ് കാലാവസ്ഥ എങ്ങനെയാണ് എന്നുള്ളത്. എന്നാൽ അയോദ്ധ്യയിലേക്ക് എത്തുന്നവർക്ക് ആ ടെൻഷൻ ഇനി വേണ്ട. കേന്ദ്ര കാലാവസ്ഥ വകുപ്പ് (ഐ.എം.ഡി) ഇതിനായി അടുത്തിടെ പുതിയ വെബ്സൈറ്റ് ആരംഭിച്ചിരുന്നു. 140 ഇന്ത്യൻ- വിദേശ ഭാഷകളിലാണ് വിവരങ്ങൾ ലഭിക്കുക.
ദിനവും അയോദ്ധ്യയുടെയും നഗരത്തിന് ചുറ്റുമുള്ള സ്ഥലങ്ങളുടെയും കാലാവസ്ഥ റിപ്പോർട്ടുകൾ വെബ്സൈറ്റ് വഴി ലഭ്യമാകും. വെബ്സൈറ്റ് തുറക്കുമ്പോൾ തന്നെ പേജിലേക്കുള്ള ലിങ്ക് പോപ്പ് അപ്പ് ചെയ്യും. ഇത് ക്ലിക്കുചെയ്യുമ്പോൾ കാലാവസ്ഥ പ്രവചന വിഭാഗത്തിലേക്ക് എത്തുന്നു. വെബ്‌പേജിൽ അയോദ്ധ്യയുടെയും സമീപത്തുള്ള മിൽകിപൂർ, മനക്പൂർ, ഹരയ്യ, ഭിത്തി, ഭാൻപൂർ തുടങ്ങിയ സ്ഥലങ്ങളുടെ കാലാവസ്ഥാ പ്രവചനങ്ങൾ ലഭിക്കും. ഇതിന് പുറമേ പ്രയാഗ്‌രാജ്, വാരണാസി, ന്യൂഡൽഹി, ലക്നൗ എന്നീ സ്ഥലങ്ങളുടെ കാലാവസ്ഥ റിപ്പോർട്ടുകളും ഐഎംഡിയുടെ യുപി വിഭാഗത്തിൽ ലഭിക്കും.
അയോദ്ധ്യക്ക് പുറമേ വിനോദസഞ്ചാരികൾ ഇവിടങ്ങളിലും സന്ദർശിക്കാൻ സാധ്യതയുള്ളതിനാലാണ് ഇത്തരമൊരു സംവിധാനം താപനില, ഈർപ്പം, കാറ്റിന്റെ ഗതി, മഴ ഉൾപ്പെടെ കാലാവസ്ഥയുടെ പൂർണ്ണ ചിത്രം നൽകാൻ വെബ്‌പേജിന് കഴിയുന്നു.
