ഡൽഹി: എല്ലാ ഭാരതീയരും കാത്തിരുന്ന നിമിഷത്തിനാണ് ജനുവരി 22 സാക്ഷ്യം വഹിക്കാൻ പോകുന്നതെന്ന് ബിജെപി ദേശീയ അദ്ധ്യക്ഷൻ ജെ.പി നദ്ദ. അയോദ്ധ്യയിലെ രാമക്ഷേത്രത്തിൽ പ്രാണപ്രതിഷ്ഠാ ചടങ്ങുകൾ നടക്കുമ്പോൾ എല്ലാവരും ആഘോഷമാക്കണമെന്നും രാജ്യത്തെ എല്ലാ ക്ഷേത്രങ്ങളിലും വീടുകളിലും രാമജ്യോതി തെളിയിക്കണമെന്നും ജെ.പി നദ്ദ ആവശ്യപ്പെട്ടു. വിക്ഷിത് ഭാരത് പരിപാടിയിൽ ഇന്ത്യൻ പ്രവാസികളെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
“എല്ലാ ഭാരതീയരും കാത്തിരിക്കുന്ന നിമിഷത്തിനാണ് നാം സാക്ഷ്യം വഹിക്കാൻ പോകുന്നത്. നൂറ്റാണ്ടുകളുടെ പരീക്ഷണങ്ങൾക്കും പോരാട്ടങ്ങൾക്കും ശേഷം സത്യവും നീതിയും വിജയിച്ചു. ജനുവരി 22-ന് നമ്മുടെ ഭഗവാൻ രാമൻ തന്റെ വീട്ടിലേക്ക് മടങ്ങിയെത്തും. ഭാരതത്തിലെ വായുവിൽ മുഴുവൻ സന്തോഷവും ആഘോഷവും നിറഞ്ഞിരിക്കുന്നു. ആത്മീയ പൂർത്തീകരണം. ലോകത്ത് എവിടെയായിരുന്നാലും ഈ സുപ്രധാന ആഘോഷത്തിന്റെ ഭാഗമാകാൻ ഞാൻ നിങ്ങളോട് അഭ്യർത്ഥിക്കുന്നു”- പ്രവാസികളോടായി ജെ.പി നദ്ദ പറഞ്ഞു.
പ്രാണപ്രതിഷ്ഠാ ചടങ്ങിന് ശ്രീരാമ ജന്മഭൂമി തീർത്ഥ ക്ഷേത്ര ട്രസ്റ്റിന്റെ ക്ഷണമുണ്ടെങ്കിലും ജെ.പി നദ്ദ അയോദ്ധ്യയിൽ എത്തുന്നില്ല. ജണ്ടേവാലൻ ക്ഷേത്രത്തിൽ വച്ച് സംഘടിപ്പിക്കുന്ന പരിപാടിയിലൂടെ ചരിത്ര മുഹൂർത്തം ഭക്തർക്കൊപ്പം അദ്ദേഹം വീക്ഷിക്കും. 500 വർഷത്തെ പോരാട്ടത്തിനൊടുവിലാണ് മഹത്തായ ക്ഷേത്രം ഉയരുന്നതെന്നും ജനുവരി 22-ന് ശേഷം കുടുംബത്തോടൊപ്പം ദർശനത്തിനായി അയോദ്ധ്യയിലെത്തുമെന്നും അദ്ദേഹം അറിയിച്ചിട്ടുണ്ട്.
