പത്തനംതിട്ട: പത്തനംതിട്ട- കോയമ്പത്തൂർ കെഎസ്ആർടിസി സർവീസിനെക്കാൾ നേരത്തെ ഓടാൻ റോബിൻ ബസ്. ഫെബ്രുവരി 1 മുതൽ പത്തനംതിട്ടയിൽ നിന്നും പുലർച്ചെ 4 മണിക്ക് ഓടാനാണ് തീരുമാനം. പുലർച്ചെ 4:30-നാണ് കെഎസ്ആർടിസി പത്തനംതിട്ടയിൽ നിന്നും കൊയമ്പത്തൂരിലേക്ക് സർവീസ് നടത്തുന്നത്.
പത്തനംതിട്ടയ്ക്ക് പുറമെ അടൂരിലേക്കും സർവീസ് നീട്ടാൻ റോബിൻ ബസ് പദ്ധതിയിടുന്നുണ്ട്. പുലർച്ചെ 3.30-ന് അടൂരിൽ നിന്നും പുറപ്പെടുന്ന ബസ് റാന്നി, എരുമേലി, തൃശൂർ, പാലക്കാട് വഴി കോയമ്പത്തൂരിലെത്തും. അവിടെ നിന്നും വൈകിട്ട് 6-ന് പുറപ്പെട്ട് പുലർച്ചെ 1 മണിക്ക് അടൂരിലുമെത്തും. കെഎസ്ആർടിസി ബസുമായി മത്സരത്തിനില്ലെന്നും യാത്രക്കാരുടെ ആവശ്യത്തിനാണ് പരിഗണ നൽകുന്നതെന്നും റോബിൻ ബസുടമ പറഞ്ഞു. കൊയമ്പത്തൂരിലേക്ക് സർവീസ് നടത്തുന്ന മിക്ക കെഎസ്ആർടിസി ബസും തകരാറില്ലാണ്. തകരാറുകളുള്ള ബസുകൾ മാറ്റി പുതിയ ബസുകൾ ഇറക്കാൻ സർക്കാർ തയ്യാറാവുന്നുമില്ല. ഇതിനാൽ യാത്രക്കാർ ബുദ്ധിമുട്ട് അനുഭവിക്കാറുണ്ട്. ഇതിനൊരു പരിഹാരമെന്ന പോലെയാണ് കോയമ്പത്തൂരിലേക്ക് സർവീസ് നടത്താൻ തീരുമാനിച്ചതെന്നും അദ്ദേഹം പറഞ്ഞു.
