തിരുവനന്തപുരം: പ്രഥമ രാജ്യാന്തര കായിക ഉച്ചകോടിക്ക് ഇന്ന് കാര്യവട്ടം സ്പോർട്സ് ഹബ്ബിൽ തുടക്കമാകും. വൈകിട്ട് 6 മണിക്ക് മുഖ്യമന്ത്രി പിണറായി വിജയൻ ഉച്ചകോടി ഉദ്ഘാടനം ചെയ്യും. ഇന്ന് ആരംഭിക്കുന്ന ഉച്ചകോടി 26 വരെ തുടരും.
കേരള ക്രിക്കറ്റ് അസോസിയേഷൻ ബിസിസിഐയുടെ സഹായത്തോടെ കൊച്ചിയിൽ നിർമ്മിക്കുന്ന ക്രിക്കറ്റ് സ്റ്റേഡിയം, മലപ്പുറത്തും കോഴിക്കോടുമായി നിർമ്മിക്കുന്ന രാജ്യാന്തര ഫുട്ബോൾ സ്റ്റേഡിയങ്ങൾ തുടങ്ങിയ പദ്ധതികൾ ഔദ്യോഗികമായി ഉച്ചകോടിയിൽ അവതരിപ്പിക്കും.
സ്പോർട്സ് എക്സ്പോ, കായിക സമ്മേളനങ്ങൾ, സെമിനാറുകൾ എന്നിവയാണ് നാല് ദിവസമായി നടക്കുന്നത്. പ്രമുഖ കായിക താരങ്ങളായ അഞ്ജു ബോബി ജോർജ്, ഐഎം വിജയൻ, ബൈചൂങ് ബൂട്ടിയ, സഞ്ജു സാംസൺ, മിന്നുമണി, സി കെ വിനീത് ഉൾപ്പെടെയുള്ളവരും വിവിധ കായിക സംഘടനകളുടെ പ്രതിനിധികളും ഉച്ചകോടിയിലെ വിവിധ സെക്ഷനുകളിൽ പങ്കെടുക്കും.
