കങ്കണാ റണാവത്ത് പ്രധാനവേഷത്തിലെത്തുന്ന ചിത്രമായ എമർജൻസിയുടെ റിലീസ് ഡേറ്റ് പുറത്ത്. ചിത്രം ജൂൺ 14 നാണ് തീയേറ്ററിലെത്തുക. ഇന്ദിര പ്രിയദർശിനി ഇന്ത്യയിൽ അടിയന്തരാവസ്ഥ പ്രഖ്യാപിച്ച് ജനാധിപത്യത്തെ അട്ടിമറിച്ച കാലഘട്ടത്തെ വിശദീകരിക്കുന്നതാണ് ചിത്രം. ട്വിറ്ററിലൂടെ കങ്കണ തന്നെയാണ് റിലീസ് ഡേറ്റ് പ്രഖ്യാപിച്ചിരിക്കുന്നത്.
ചിത്രത്തിന്റെ സംവിധാനം കങ്കണ തന്നയാണ് നിർവഹിച്ചിരിക്കുന്നത്. റെണു പിത്തിയോടൊപ്പം ചേർന്ന് കങ്കണയുടെ മണികർണിക പ്രൊഡക്ഷൻസാണ് ചിത്രം നിർമ്മിച്ചിരിക്കുന്നത്. ഛായാഗ്രാഹണം ടെറ്റ്സുവോ നഗാത്തയാണ്. റിതേഷ് ഷായുടേതാണ് തിരക്കഥ.
ചിത്രത്തിൽ അനുപം ഖേറാണ് ജയപ്രകാശ് നാരായണായി എത്തുന്നത്. മലയാളിയായ വിശാഖ് നായർ സഞ്ജയ് ഗാന്ധിയായും മിലിന്ദ് സോമൻ ഫീൽഡ് മാർഷൽ സാം മനേക്ഷായായും എത്തുന്നു. ശ്രേയസ് തൽപ്പഡെയാണ് മുൻ പ്രധാനമന്ത്രി അടൽ ബിഹാരി വാജ്പേയായി വേഷമിടുന്നത്. സതീഷ് കൗശിക് ജഗ്ജീവൻ റാമായും ചിത്രത്തിൽ എത്തുന്നു. ഹിന്ദി ഉൾപ്പെടെ വിവിധ ഭാഷകളിൽ പുറത്തിറങ്ങുന്ന ചിത്രത്തിലെ ഗാനങ്ങൾ ചിട്ടപ്പെടുത്തിയിരിക്കുന്നത് പ്രശസ്ത തമിഴ് സംഗീത സംവിധായകനായ ജി.വി പ്രകാശ് കുമാറാണ്.