മുംബൈ: നൂപുർ സ്കൂൾ ഓഫ് ഡാൻസിന്റെ 14-ാമത് വാർഷികം മാട്ടുംഗ മൈസൂർ അസോസിയേഷൻ ഹാളിൽ നടന്നു. കെ.ഈ.എം ഹോസ്പിറ്റൽ ന്യൂറോളജി വിഭാഗം മേധാവി ഡോ. സംഗീത റാവത്ത് വാർഷികാഘോഷം ഉദ്ഘാടനം ചെയ്തു. ഹോളി ക്രോസ്സ് സ്കൂൾ പ്രിൻസിപ്പൽ ആർലീൻ ഗോമസ് മുഖ്യാതിഥിയായി. പവായ് ഇംഗ്ലീഷ് സ്കൂൾ പ്രിൻസിപ്പൾ ഷേർലി പിള്ള, സാമൂഹ്യപ്രവർത്തക രാഖി സുനിൽ എന്നിവർ നർത്തകിമാർക്ക് സമ്മാനവിതരണം നടത്തി. നൃത്താദ്ധ്യാപിക നിഷ ഗിൽബർട്ടിന്റെ നേതൃത്വത്തിൽ നാൽപ്പതിലേറെ കുട്ടികൾ പരിപാടിയിൽ നൃത്തം അവതരിപ്പിച്ചു.
ശൈലിശുദ്ധിയിലൂന്നി പുതിയകാലത്തെ അഭിസംബോധന ചെയ്യുന്ന ഒരു വ്യാകരണമാണ് ഈ മാർഗ്ഗത്തിൽ നിഷ അവലംബിച്ചിട്ടുള്ളത്. 5 വയസ്സുമുതൽ 50 വയസ്സ് വരെയുള്ളവരാണ് നൃത്ത വിരുന്നിൽ പങ്കെടുത്തത്. ലാൽഗുഡി ജയരാമന്റെ 9 താളങ്ങളിൽ 9 രസങ്ങളെ അവതരിപ്പിച്ച വർണ്ണം ആയിരുന്നു പരിപാടിയിൽ ഏറ്റവും ശ്രദ്ധേയമായത്. തഞ്ചാവൂർ നാൽവരുടെ പരമ്പരയിലെ കൃതിയായ പെരുംകോവിൽ എന്ന ശ്രീരാഗത്തിൽ ചിട്ടപ്പെടുത്തിയ കൃതിയും ഉന്നതനിലവാരം പുലർത്തി. ബൃഹദീശ്വര ക്ഷേത്രം സന്ദർശിക്കുന്ന ഒരു ദേവദാസിയുടെ ദൃശ്യാനുഭവങ്ങൾ മനോഹരമായി അവതരിപ്പിക്കപ്പെട്ടിട്ടുള്ള കൃതി താളജ്ഞാനവും, സ്വരജ്ഞാനവും, കലവറയില്ലാത്ത അറിവും, ശമനമില്ലാതെ വർഷിക്കുന്ന ചുവടുകളും നൽകി അനുഗ്രഹിക്കുവാൻ ബൃഹദീശ്വരനോട് പ്രാർത്ഥിക്കുന്നതാണ്. നൂപുർ അവലംബിക്കുന്ന അറിവിന്റെ നാനാംശങ്ങൾ സ്വാംശീകരിക്കുന്ന ഒരു കലാസമീപനത്തോട് ചേർന്ന് നിൽക്കുന്നതിനാലാണ് കീർത്തനം തിരഞ്ഞെടുത്തതെന്ന് നിഷ ഗിൽബർട്ട് പറഞ്ഞു.
ത്യാഗരാജ കൃതികളായ നഗുമോമു, സാമജവരഗമന, മൈസൂർ വാസുദേവാചാര്യരുടെ ചാമുണ്ഡേശ്വരിസ്തോത്രം, കലിംഗനർത്തന തില്ലാന, മഹിഷാസുര മർദ്ദിനി സ്തോത്രം, സ്വാതി തിരുനാൾ കൃതിയായ ചലിയേ, അഭംഗ്, ആട് പാമ്പേ തുടങ്ങി മൂന്ന് മണിക്കൂർ നീണ്ടു നിന്ന നൃത്തവിരുന്ന് ആസ്വദിക്കാൻ നിറഞ്ഞ സദസായിരുന്നു സന്നിഹിതരായത്.