കേരളത്തിൽ വളരെ സുലഭമായി ലഭിക്കുന്ന ഒരു ഇലക്കറിയാണ് വള്ളിച്ചീര എന്നറിയപ്പെടുന്ന വഷളച്ചീര. ഒരു തൈ നട്ടാൽ അധികം പരിചരണമൊന്നും ആവശ്യമില്ലാതെ തഴച്ച് വളരും എന്നത് തന്നെയാണ് ഇതിന്റെ പ്രത്യേകത. വേലിയിലോ പന്തലിൽ പടർത്തിവിട്ടോ വളർത്തിയെടുക്കാവുന്നതാണ്. എന്നാൽ പേര് പോലെ വഷളനല്ല വഷളച്ചീര നിറയെ പോഷക ഗുണങ്ങളടങ്ങിയ ചെടിയാണിത്.
ചുവപ്പ്, പച്ച നിറങ്ങളിലാണ് വഷളച്ചീര പ്രധാനമായും കാണപ്പെടുന്നത്. ഇതിൽ ചുവപ്പ് നിറത്തിലുള്ളതാണ് ഏറെ സുലഭമായി ലഭിക്കുന്നത്. വിറ്റാമിൻ എ, സി, അയൺ, കാത്സ്യം, പ്രോട്ടീൻ, ബീറ്റാ കരോട്ടിൻ എന്നിവയുടെ കലവറയുമാണ്. വള്ളിച്ചീരയുടെ ഇലയും തണ്ടും ഭക്ഷണത്തിനായി ഉപയോഗിക്കാവുന്നതാണ്. ഇലയും തണ്ടും ഉപയോഗിച്ച് തോരൻ, സാമ്പാർ എന്നീ വിഭവങ്ങൾ തയ്യാറാക്കാം. ഇല ഉപയോഗിച്ച് ബജിയും തയ്യാറാക്കാവുന്നതാണ്.
വള്ളിച്ചീര നട്ട് ആറാഴ്ചയ്ക്കുള്ളിൽ തന്നെ നമുക്ക് വിളവെടുക്കാവുന്നതാണ്. വാതപിത്തരോഗങ്ങൾ, പൊള്ളൽ, അർശസ്സ്, ചർമ്മ രോഗങ്ങൾ, തുടങ്ങിയ രോഗങ്ങൾക്ക് ഒരു പ്രതിവിധി എന്നോണം വള്ളിച്ചീര ഉപയോഗിക്കാവുന്നതാണ്.
കൂടാതെ പൊള്ളലിന്റെയും മുറിവിന്റെയും പാടുകൾ മാറാൻ വള്ളിച്ചീര സഹായിക്കും. ഇലയും തണ്ടും നന്നായി അരച്ച് പൊള്ളലിന്റെ പാടുകളുള്ള ഭാഗത്ത് പുരട്ടിയാൽ മതിയാകും.
വളരെ മൃദുവായ ഇലകളാണ് വള്ളിച്ചീരക്കുള്ളത്. അതുകൊണ്ടുതന്നെ പാകം ചെയ്യുമ്പോൾ ശ്രദ്ധിക്കേണ്ടതുണ്ട്. വള്ളിച്ചീര പാകം ചെയ്യാൻ വെള്ളത്തിന്റെ ആവശ്യവുമില്ല. അഞ്ച് മിനുട്ടിനുള്ളിൽ പാകം ചെയ്യാൻ കഴിയുന്ന ഒരു വിഭവമാണിത്.
