ജയ്പൂർ: റിപ്പബ്ലിക് ദിനാഘോഷത്തിൽ മുഖ്യാതിഥിയായി പങ്കെടുക്കാനെത്തിയ ഫ്രഞ്ച് പ്രസിഡന്റ് ഇമ്മാനുവൽ മാക്രോണിന് അയോദ്ധ്യാ രാമക്ഷേത്ര മാതൃക സമ്മാനിച്ച് പ്രധാനമന്ത്രി നരേന്ദ്രമോദി. ഹവാ മഹൽ സന്ദർശന വേളയിലാണ് ഫ്രഞ്ച് പ്രസിഡന്റിന് പ്രധാനമന്ത്രി രാമക്ഷേത്രത്തിന്റെ മാതൃക സമ്മാനിച്ചത്. കരകൗശല വിൽപ്പന കേന്ദ്രത്തിൽ പ്രധാനമന്ത്രി മാക്രോണിന് യുപിഐ ഇടപാടുകളെ കുറിച്ച് വിശദീകരിക്കുന്നതും ഒരുമിച്ച് ചായകുടിക്കുന്നതുമായ ദൃശ്യങ്ങൾ സമൂഹമാദ്ധ്യമങ്ങളിൽ വൈറലായി. മാക്രോൺ യുപിഐ ഇടപാട് നടത്തുന്നതും ദൃശ്യങ്ങളിൽ കാണാനാകും.
പിങ്ക് സിറ്റിയിൽ നിന്ന് ഹവാ മഹലിലേക്ക് ഇരുനേതാക്കളും റോഡ് ഷോ നടത്തിയിരുന്നു. ആംബർ ഫോർട്ടും ജന്തർ മന്തറും സന്ദർശിച്ചതിന് ശേഷമായിരുന്നു ഇരുനേതാക്കളും റോഡ് ഷോയ്ക്കെത്തിയത്. ഇന്ന് വൈകിട്ട് ജയ്പൂരിലെത്തിയ മാക്രോണിനെ മുഖ്യമന്ത്രി ഭജൻലാൽ ശർമ്മയും വിദേശകാര്യ മന്ത്രി എസ് ജയശങ്കറും ചേർന്നാണ് സ്വീകരിച്ചത്.
റിപ്പബ്ലിക് പരേഡിൽ പങ്കെടുക്കുന്ന ആറാമത്തെ ഫ്രഞ്ച് ഭരണാധികാരിയാണ് മാക്രോൺ. കഴിഞ്ഞ വർഷം ജൂലൈ 13, 14 തീയതികളിൽ ബാസ്റ്റിൽ ഡേ ദിനത്തിൽ പ്രധാനമന്ത്രി ഫ്രാൻസ് സന്ദർശിച്ചിരുന്നു. ഇരു രാജ്യങ്ങളും തമ്മിലുള്ള ദൃഢബന്ധം വിളിച്ചോതുന്നതായിരുന്നു പ്രധാനമന്ത്രിക്ക് ഫ്രാൻസിൽ ലഭിച്ച സ്വീകരണം.
