മലയാളികൾ ഇരുകയ്യും നീട്ടി സ്വീകരിച്ച ചിത്രമായിരുന്നു മാളികപ്പുറം. നൂറുകോടി ക്ലബ്ബിൽ ഇടംനേടിയ ചിത്രം അടുത്തിടെയായിരുന്നു ഒരു വർഷം പൂർത്തിയാക്കിയത്. പിന്നാലെ മാളികപ്പുറം ടീം വീണ്ടും ഒന്നിക്കുമെന്ന വാർത്തയും പുറത്തുവന്നിരുന്നു. മാളികപ്പുറം സിനിമയുടെ തിരക്കഥാകൃത്ത് അഭിലാഷ് പിള്ളയാണ് ഇക്കാര്യം സമൂഹമാദ്ധ്യമങ്ങളിലൂടെ അറിയിച്ചത്.
പുതിയ ചിത്രത്തിന്റെ തിരക്കഥ പൂർത്തിയായെന്ന വാർത്ത കഴിഞ്ഞ ദിവസം അഭിലാഷ് പിള്ള സമൂഹമാദ്ധ്യമങ്ങളിൽ പങ്കുവച്ചിരുന്നു. ഇപ്പോഴിതാ ചിത്രത്തിന്റെ കഥ കുട്ടിത്താരമായ ദേവനന്ദയോട് പറഞ്ഞെന്നും കഥാപാത്രത്തിനായി ദേവനന്ദ തയ്യാറെടുപ്പുകൾ ആരംഭിച്ചെന്നും ആരാധകരെ അറിയിക്കുകയാണ് അഭിലാഷ് പിള്ള. പുതിയ ചിത്രത്തിന്റെ കഥ മൂകാംബിക ദേവീ ക്ഷേത്രത്തിൽ വച്ചാണ് ദേവനന്ദയോട് പറഞ്ഞത്.
View this post on Instagram
‘പുതിയ സിനിമയുടെ കഥ ദേവുവിന് മൂകാംബികയിൽ വച്ച് പറഞ്ഞു കൊടുത്തു. ഇനിയുള്ള ദിവസങ്ങൾ അവൾ കഥാപാത്രത്തിലേക്കുള്ള യാത്രയിലായിരിക്കും.’ എന്നായിരുന്നു അഭിലാഷ് പിള്ള സമൂഹമാദ്ധ്യമമായ ഇൻസ്റ്റഗ്രാമിൽ പങ്കുവച്ച കുറിപ്പ്. ചിത്രത്തെ കുറിച്ചുള്ള കൂടുതൽ വിശേഷങ്ങൾ പിന്നാലെ എത്തും എന്നും അഭിലാഷ് പിള്ള കുറിച്ചു.
അഭിലാഷ് പിള്ളയുടെ തിരക്കഥയിൽ ഒരുങ്ങുന്ന ചിത്രം സംവിധാനം ചെയ്യുന്നത് വിഷ്ണു ശശി ശങ്കർ ആണ്. സിനിമയുടെ ചിത്രീകരണം ഉടൻ ആരംഭിക്കും. 2024 ഓണത്തിന് തീയേറ്ററിൽ എത്തിക്കുന്ന തരത്തിലാകും ചിത്രത്തിന്റെ ജോലികൾ പൂർത്തിയാക്കുന്നത്. മുഴുവൻ ടീമിനെ കുറിച്ചുള്ള വിവരങ്ങൾ വൈകാതെ പ്രഖ്യാപിക്കുമെന്നും അണിയറ പ്രവർത്തകർ നേരത്തെ അറിയിച്ചിരുന്നു.
