തിംഫു: ഭൂട്ടാൻ പ്രധാനമന്ത്രി ലിയോൻചെൻ ഷെറിംഗ് ടോബ്‌ഗേയുമായി ഉഭയകക്ഷി ചർച്ച നടത്തി കേന്ദ്ര വിദേശകാര്യ സെക്രട്ടറി മോഹൻ ക്വാത്ര. ഇരു രാജ്യങ്ങളും തമ്മിലുള്ള നയതന്ത്രബന്ധം ഏറെ ശക്തമാണെന്നും വിദേശകാര്യ സെക്രട്ടറി മോഹൻ ക്വാത്ര അറിയിച്ചു. ഭൂട്ടാൻ സന്ദർശനെത്തിയ മോഹൻക്വാത്ര, ഭൂട്ടാൻ വിദേശ്യ മന്ത്രി ലിയോൺപോ ഡി.എൻ ധുങ്യേലുമായും കൂടിക്കാഴ്ച നടത്തി.
” വിദേശകാര്യ സെക്രട്ടറി മോഹൻ ക്വാത്ര ഭൂട്ടാനിൽ പുതുതായി തിരഞ്ഞെടുക്കപ്പെട്ട പ്രധാനമന്ത്രി ലിയോൻചെൻ ഷെറിംഗ് ടോബ്‌ഗേയുമായി കൂടിക്കാഴ്ച നടത്തി. ഇരു രാജ്യങ്ങളും പങ്കിടുന്ന സൗഹൃദ ബന്ധങ്ങൾ ഒരിക്കൽ കൂടി ഊട്ടിയുറപ്പിച്ചു. വിവിധ മേഖലകളിൽ ഇന്ത്യയും ഭൂട്ടാനും തമ്മിലുള്ള ബന്ധം കൂടുതൽ മെച്ചപ്പെടുത്തുന്നതിനും ദൃഢമാക്കുന്നതിനുമുള്ള വഴികൾ ഇരു രാജ്യങ്ങളും തമ്മിൽ ചർച്ച ചെയ്തിട്ടുണ്ട്.”- ഇന്ത്യൻ എംബസി കുറിച്ചു.
ഇരു രാജ്യങ്ങളുടെയും വികസന പങ്കാളിത്തം, ബഹിരാകാശം, ഊർജ്ജം, വ്യാപാരം, സാങ്കേതികവിദ്യ, സാമ്പത്തികം എന്നിവയുമായി ബന്ധപ്പെട്ട് വിപുലമായ ചർച്ചകാളാണ് നടന്നതെന്നും ഇന്ത്യൻ എംബസി അറിയിച്ചു. ജനുവരി 29 മുതൽ 31 വരെ മൂന്ന് ദിവസത്തെ ഔദ്യോഗിക സന്ദർശനത്തിനായാണ് ക്വാത്ര ഭൂട്ടാനിലെത്തിയിരിക്കുന്നത്. അവിടെ എത്തിയ അദ്ദേഹത്തെ ഭൂട്ടാൻ വിദേശകാര്യ സെക്രട്ടറി ഓം പെമ ചോഡൻ സ്വാഗതം ചെയ്തു. ഭൂട്ടാൻ രാജാവ് ജിഗ്മേ ഖേസർ നാംഗ്യേൽ വാങ്ചുക്കുമായും ക്വാത്ര കൂടിക്കാഴ്ച നടത്തുമെന്ന് ഭൂട്ടാനിലെ ഇന്ത്യൻ എംബസി അറിയിച്ചു.
