സംഗീതപരിപാടിക്കിടയിൽ കാണികളോട് അപമര്യാദയായി പെരുമാറിയ പാക് ഗായകന്റെ വീഡിയോ സമൂഹമാദ്ധ്യമങ്ങളിൽ കുറച്ച് ദിവസങ്ങൾക്ക് മുമ്പാണ് വൈറലായത്. പാകിസ്താൻ ഗായകൻ ബിലാൽ സയീദ് കാണികൾക്കിടയിലേക്ക് മൈക്ക് വലിച്ചെറിഞ്ഞതായിരുന്നു സംഭവം.
പഞ്ചാബ് ഗ്രൂപ്പ് ഓഫ് കോളേജസിന്റെ യൂത്ത് മ്യൂസിക്കൽ ഫെസ്റ്റിവലിലായിരുന്നു പാക് ഗായകന്റെ അപമര്യാദയോട് കൂടിയുള്ള പ്രതികരണം. പരിപാടിക്കിടയിൽ കാണികൾ മോശമായി പെരുമാറിയതിനാൽ യുവാക്കൾക്ക് നേരെ മൈക്ക് വലിച്ചെറിഞ്ഞ് വേദിയിൽ നിന്ന് ഇറങ്ങി പോകുകയാണ് ബിലാൽ സയീദ് ചെയ്തത്. സംഭവം സമൂഹമാദ്ധ്യമങ്ങളിൽ വിവാദമായതോടെ മാപ്പ് പറഞ്ഞ് രംഗത്ത് എത്തിയിരിക്കുകയാണ് പാക് ഗായകൻ.
‘വേദികളിലെത്തി സംഗീത പരിപാടിയിൽ ഏർപ്പെടുമ്പോൾ മാത്രമാണ് ഞാൻ പൂർണതയിൽ എത്തുന്നത്. എന്റെ രോഗങ്ങൾ മറ്റ് സമ്മർദ്ദങ്ങൾ ഒക്കെയും ആ വേളയിൽ ഞാൻ മറക്കുന്നു. പക്ഷെ, എനിക്ക് വേദിയിൽ ഞാൻ ആഗ്രഹിക്കുന്ന ബഹുമാനം കിട്ടണം. എന്റെ ആരാധകരെ ഞാൻ സ്നേഹിക്കുന്നുണ്ട്. ആൾക്കൂട്ടത്തിനിടയിൽ നിന്നുള്ള മോശം പെരുമാറ്റം എന്റെ ആദ്യ അനുഭവമല്ല. പക്ഷെ, ഞാൻ ഒരിക്കലും വേദി വിടാൻ പാടില്ലായിരുന്നു.’- ബിലാൽ കുറിച്ചു.
