ഭൂമിയുടെ ഉപഗ്രഹമായ ചന്ദ്രൻ ചുരുങ്ങുന്നുവെന്ന് കണ്ടെത്തൽ. കഴിഞ്ഞ ഏതാനും കോടി വർഷങ്ങളായി ചന്ദ്രനിൽ മാറ്റങ്ങൾ സംഭവിക്കുന്നു. ശക്തമായ ഭൂചലനങ്ങളാണ് സംഭവിക്കുന്നതെന്നും നാസയുടെ റിപ്പോർട്ടിൽ പറയുന്നു.
150 അടിയോളം ചുറ്റളവിൽ ചന്ദ്രൻ ചുരുങ്ങിയെന്നാണ് ജൂലൈ 25-ന് പുറത്തുവിട്ട പഠനത്തിൽ പറയുന്നത്. പുറത്തെ കാമ്പ് തണുത്തുറയാൻ ഇത് കാരണമായി. നിരന്തമുള്ള ഈ ചുരുങ്ങലുകൾ ചന്ദ്രോപരിതലത്തിൽ വൻ പ്രകമ്പന്നങ്ങൾക്ക് കാരണമാകുന്നു. മനുഷ്യന് പര്യവേക്ഷണം ചെയ്യുന്നതിൽ പ്രതിസന്ധി സൃഷ്ടിക്കാൻ ഇത് കാരണമാകുമെന്നും പഠനത്തിൽ പറയുന്നു. നാസ, സ്മിത്സോണിയൻ, അരിസോണ സ്റ്റേറ്റ് യൂണിവേഴ്സിറ്റി, യൂണിവേഴ്സിറ്റി ഓഫ് മേരിലാൻഡ് എന്നിവിടങ്ങളിൽ നിന്നുള്ള ശാസ്ത്രജ്ഞരാണ് പഠനം നടത്തിയത്.
തുടർച്ചയായ ചലനങ്ങളും ചുരുങ്ങലും ചന്ദ്രന്റെ ദക്ഷിണധ്രുവത്തിന് ചുറ്റുമുള്ള ഉപരിതലത്തിൽ മാറ്റങ്ങൾ വരുത്തിയതായി ശാസ്ത്രജ്ഞർ കണ്ടെത്തി. നാസയുടെ ക്രൂഡ് ആർട്ടെമിസ് III ദൗത്യം ഇറങ്ങുന്ന പ്രദേശത്താണ് ഈ മാറ്റം കണ്ടെത്തിയിരിക്കുന്നത്. ചന്ദ്രന്റെ പുറത്തെ പാളിയിൽ സമാന രീതിയിൽ ആയിരക്കണക്കിന് ഇടങ്ങളാണ് ചുരുങ്ങിയതായി കണ്ടെത്തിയിട്ടുള്ളത്. ചന്ദ്രന്റെ ചൂടേറിയ അന്തർഭാഗം തണുപ്പിക്കുന്നതും ഭൂമി ചെലുത്തുന്ന വേലിയേറ്റ ശക്തികളും മൂലമാണ് സങ്കോചം സംഭവിക്കുന്നത്. ഇത് പുറമേ ചുക്കി ചുള്ളിഞ്ഞത് പോലെ തോന്നിക്കുന്നു.
പഴുത്ത മുന്തിരി ഉണക്ക മുന്തിരി ആകുന്നത് പോലെയാണ് ഈ ചുരുങ്ങലെന്ന് ശാസ്ത്രജ്ഞർ പറയുന്നു. മുന്തിരിക്ക് മൃദുലമായ ചർമം ആണെങ്കിൽ ചന്ദ്രന് പൊട്ടുന്ന പ്രതലമാണുള്ളത്. പ്രതലങ്ങൾ പരസ്പരം കൂട്ടിമുട്ടുന്നത് വഴി വിള്ളലുകൾ സംഭവിക്കുന്നു. ചന്ദ്രന്റെ പ്രതലത്തിൽ നിന്ന് 100 മൈൽ അകലെ മാത്രമാണ് ഈ പ്രകമ്പനങ്ങൾ ഉണ്ടാകുന്നത്. ഭൂമിയിൽ ഉണ്ടാകുന്നത് പോലെ സെക്കൻഡുകൾ അല്ല, മറിച്ച് മണിക്കൂറുകളോളം നീണ്ടുനിൽക്കുന്നവയാണ് ചന്ദ്രനിലെ പ്രകമ്പനങ്ങൾ.