സിനിമാ പ്രേമികൾ ആകാംക്ഷയോടെ കാത്തിരിക്കുന്ന മമ്മൂട്ടി ചിത്രമാണ് ഭ്രമയുഗം. ചിത്രത്തിന്റെ ഓരോ അപ്ഡേഷനും വൻ സ്വീകാര്യതയാണ് ലഭിക്കുന്നത്. കഴിഞ്ഞ ദിവസം ചിത്രത്തിന്റെ സെൻസറിംഗ് കഴിഞ്ഞ വിവരം പുറത്ത് വന്നിരുന്നു. ഇപ്പോഴിതാ, ഹൊറർ ത്രില്ലർ ജോണറിൽപ്പെടുന്ന സിനിമയുടെ റണ്ണിംഗ് ടൈമാണ് പുറത്ത് വിട്ടിരിക്കുന്നത്. ഏകദേശം 140മിനിറ്റാണ് ചിത്രത്തിന്റെ റണ്ണിംഗ് ടൈമെന്നാണ് ട്രേഡ് അനലിസ്റ്റുകൾ പറയുന്നത്. അതായത് രണ്ട് മണിക്കൂറും 20 മിനിറ്റും.
സിനിമ ഫെബ്രുവരി 15-നാണ് തിയേറ്ററുകളിലെത്തുന്നത്. ഭൂതകാലത്തിന് ശേഷം രാഹുൽ സദാശിവൻ സംവിധാനം ചെയ്യുന്ന ചിത്രമാണ് ഭ്രമയുഗം. രാഹുൽ സദാശിവൻ തന്നെയാണ് ഭ്രമയുഗത്തിന്റെ തിരക്കഥ രചിച്ചിരിക്കുന്നത്. സംഭാഷണങ്ങൾ എഴുതിയിരിക്കുന്നത് ടി.ഡി രാമകൃഷ്ണനാണ്. നൈറ്റ് ഷിഫ്റ്റ് സ്റ്റുഡിയോസിന്റെ ബാനറിൽ ചക്രവർത്തി രാമചന്ദ്രയും എസ് ശശികാന്തും ചേർന്ന് നിർമ്മിക്കുന്ന ഈ ചിത്രം നൈറ്റ് ഷിഫ്റ്റ് സ്റ്റുഡിയോയും വൈനോട്ട് സ്റ്റുഡിയോയും ചേർന്നാണ് അവതരിപ്പിക്കുന്നത്. ആൻ്റോ ജോസഫിന്റെ ‘ആൻ മെഗാ മീഡിയ’ കേരളത്തിലെ തിയേറ്ററുകളിൽ ചിത്രം വിതരണം ചെയ്യും. ഓവർസീസ് ഡിസ്ട്രിബ്യൂഷൻ സ്വന്തമാക്കിയിരിക്കുന്നത് ട്രൂത്ത് ഗ്ലോബൽ ഫിലിംസാണ്.
മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ 5 ഭാഷകളിലായി ഒരുങ്ങുന്ന മമ്മൂട്ടിയുടെ പാൻ ഇന്ത്യൻ ചിത്രമായിരിക്കും ഭ്രമയുഗം. ഛായാഗ്രഹണം-ഷെഹ്നാദ് ജലാൽ, ചിത്രസംയോജനം-ഷഫീഖ് മുഹമ്മദ് അലി, സംഗീതം-ക്രിസ്റ്റോ സേവ്യർ, സൗണ്ട് ഡിസൈൻ-ജയദേവൻ ചക്കടത്ത്, സൗണ്ട് മിക്സ്-എം.ആർ രാജകൃഷ്ണൻ, മേക്കപ്പ്-റോണക്സ് സേവ്യർ, വസ്ത്രാലങ്കാരം-മെൽവി ജെ എന്നിവരാണ് മറ്റ് അണിയറപ്രവർത്തകർ.
