മുൻപങ്കാളിയെക്കുറിച്ചും ആ ബന്ധം വേർപ്പെട്ടതിനെക്കുറിച്ചും തുറന്ന് പറഞ്ഞ് നടിയും അവതാരകയുമായ ആര്യ. മുൻ പങ്കാളി മറ്റൊരാളുമായി ബന്ധത്തിലാണെന്ന് അറിഞ്ഞതോടെ അവരെ വെടിവെച്ച് കൊല്ലാനാണ് തോന്നിയതെന്നാണ് ആര്യ പറയുന്നത്. മുൻ പങ്കാളിക്കും ഭാര്യക്കും എന്തെങ്കിലും സംഭവിച്ചാൽ ലോകത്തിൽ ഏറ്റവും അധികം സന്തോഷിക്കുന്ന വ്യക്തി താനാണെന്നും ആര്യ പറഞ്ഞു. ഒരു ഓൺലൈൻ മാദ്ധ്യമത്തിന് നൽകിയ അഭിമുഖത്തിനിടയിലായിരുന്നു ഇക്കാര്യങ്ങൾ പറഞ്ഞത്.
‘ബിഗ് ബോസ് ഷോയിൽ നിന്നും പുറത്ത് ഇറങ്ങിയതിന് ശേഷം ഞാൻ ആദ്യം വിളിച്ചത് ആദ്യം വിളിച്ചത് അദ്ദേഹത്തെയായിരുന്നു. പക്ഷെ, അയാൾ ഫോൺ എടുക്കാതായപ്പോൾ ഞാൻ ആകെ വല്ലാത്തൊരവസ്ഥയിലായി. എനിക്ക് എന്ത് ചെയ്യണമെന്ന് പോലും അറിയാത്തൊരു അവസ്ഥയിലായിപ്പോയി. എനിക്ക് കാണാതെ അറിയാവുന്ന ഒരു നമ്പർ ആളുടെ മാത്രമാണ്. നിരവധി തവണ ഞാൻ അദ്ദേഹത്തെ വിളിച്ചിരുന്നു. എന്റെ കുഞ്ഞിനെപ്പോലും വിളിക്കാതെയാണ് അദ്ദേഹത്തെ ഞാൻ വിളിച്ചത്.
നിരവധി തവണ വിളിച്ചിട്ടും ഫോൺ എടുക്കാത്തതിനെ തുടർന്ന് ഞാൻ അദ്ദേഹത്തിന്റെ സഹോദരിയെയും വിളിച്ചു. അവരോടും ഷോ വൈൻഡപ്പ് ചെയ്ത കാര്യം പറഞ്ഞു. ആളെ വിളിച്ചിട്ട് കിട്ടിയില്ലെന്ന് പറഞ്ഞപ്പോൾ, ഞാൻ വിളിക്കാൻ പറയാമെന്ന് പറഞ്ഞു. അവളുടെ പറച്ചിലിലും ഒരു കോൺഫിഡൻസ് ഇല്ലായിരുന്നു.
അന്ന് രാത്രി ഞാൻ ഉറങ്ങിയിട്ടില്ല. അടുത്ത ദിവസം രാവിലെയും ഞാൻ ആളുടെ നമ്പറിലേക്ക് വിളിച്ചു. 4,5 തവണ വിളിച്ചതിന് ശേഷമാണ് തിരികെ എനിക്ക് അയാളുടെ കോൾ വന്നത്. അന്ന്, ആ ഫോൺ സംഭാഷണത്തിൽ സംസാരിച്ചത്. എന്റെ പങ്കാളിയോടാണെന്ന് എനിക്ക് തോന്നിയിരുന്നില്ല. ഒരു, സ്നേഹമോ എക്സൈറ്റ്മെന്റോ ഒന്നും ആ സംഭാഷണത്തിൽ നിന്നും എനിക്ക് ലഭിച്ചിരുന്നില്ല. വിളിച്ചിട്ട് കോളെടുക്കാത്ത കാര്യം ചോദിച്ചപ്പോൾ ഞാൻ ഉറങ്ങുകയായിരുന്നെന്ന മറുപടി മാത്രമാണ് ലഭിച്ചത്. 75 ദിവസത്തിനുള്ളിൽ എന്താണ് സംഭവിച്ചതെന്ന് എനിക്ക് കണക്ട് ചെയ്യാൻ പോലും കഴിയുന്നില്ലായിരുന്നു.
പിന്നെയുള്ള ദിവസങ്ങളിൽ ഞാൻ ട്രോമയിലായിരുന്നു. ആള് ദുബായിയിൽ ആയിരുന്നു, നേരിട്ട് കണ്ട് സംസാരിക്കാനും സാധിച്ചിരുന്നില്ല. പക്ഷെ ദൈവം സഹായിച്ച് ഞാൻ അത് കണ്ടു പിടിച്ചു. കറക്ട് ആയിട്ട് എന്റെ മുന്നിൽ കൊണ്ടു തന്നു. മറ്റൊരാളുമായി ബന്ധത്തിലാണെന്ന് അറിഞ്ഞതോടെ രണ്ട് പേരെയും വെടിവെച്ച് കൊല്ലാനായിരുന്നു തോന്നിയിരുന്നത്. ഇന്നും എന്റെ മാനസികാവസ്ഥ അത് തന്നെയാണ്. എനിക്ക് ഭയങ്കര ദേഷ്യം ആയിരുന്നു. പക്ഷെ അവർക്കെന്തെങ്കിലും സംഭവിച്ചു എന്ന് കേട്ടാൽ ലോകത്തിൽ ഏറ്റവും സന്തോഷവതി ഞാനായിരിക്കും. അവരിപ്പോൾ കല്യാണം കഴിച്ചു. വളരെ സന്തോഷത്തോടെ ജീവിക്കുകയാണ്. അങ്ങനെ തന്നെ പോകട്ടെ.’- ആര്യ പറഞ്ഞു.
