നീണ്ട വർഷങ്ങൾക്ക് ശേഷം ബോളിവുഡ് താരം അക്ഷയ് കുമാറും സംവിധായകൻ പ്രിയദർശനും ഒന്നിക്കുന്നെന്ന വാർത്ത കുറച്ചു നാളുകളായി സമൂഹമാദ്ധ്യമങ്ങളിൽ പ്രചരിക്കുന്നുണ്ടായിരുന്നു. ഇതുവരെയും ഇത് സംബന്ധിച്ച വിവരങ്ങളൊന്നും ഇരുവരും പുറത്ത് വിട്ടിരുന്നില്ല. ഇപ്പോഴിതാ, പ്രചരിക്കുന്ന വാർത്തകൾ സത്യമാണെന്ന് പറഞ്ഞിരിക്കുകയാണ് സംവിധായകൻ പ്രിയദർശൻ. ടൈംസ് ഓഫ് ഇന്ത്യയ്‌ക്ക് നൽകിയ അഭിമുഖത്തിനിടയിലായിരുന്നു പുതിയ ചിത്രത്തെക്കുറിച്ച് പ്രിയദർശൻ സംസാരിച്ചത്.
ഘട്ട മീഠയ്‌ക്ക് ശേഷം ഒന്നിക്കുന്ന ഒരു ഹൊറർ കോമഡി ചിത്രമാണ് പുതിയത്. നീണ്ട പതിനാല് വർഷങ്ങൾക്ക് ശേഷമാണ് അക്ഷയ്കുമാറുമായി വീണ്ടും ഒന്നിച്ച് ചിത്രമെടുക്കുന്നത്. ഭൂൽ ഭുലയ്യയുടെ ഒരു സ്പിൻ-ഓഫ് അല്ലെങ്കിൽ തുടർച്ചയെന്നാണ് നിരവധി പേർ സിനിമയെക്കുറിച്ച് പറയുന്നത്. എന്നാൽ, പുതിയ ചിത്രം അങ്ങനെയൊന്നുമല്ലെന്നാണ് പ്രിയദർശൻ പറയുന്നത്.
ഫാന്റസിയും ഹൊററും കോമഡിയുമൊക്കെ ഉൾപ്പെടുത്തിയാണ് ചിത്രം ചെയ്യുന്നത്. അക്ഷയ്കുമാറുമായി ഒന്നിച്ച് മുമ്പെടുത്ത ചിത്രങ്ങളുമായി പുതിയ ചിത്രത്തിന് ബന്ധമൊന്നുമില്ല. 2024 ഒക്ടോബറിൽ ചിത്രം തിയേറ്ററിലെത്താൻ സാധ്യതയുണ്ടെന്നും പ്രിയദർശൻ പറഞ്ഞു.
അഭിമുഖത്തിൽ അയോദ്ധ്യ രാമക്ഷേത്രത്തെ ആസ്പദമാക്കി ഒരുക്കുന്ന ഡോക്യുമെന്ററിയെക്കുറിച്ചും പ്രിയദർശൻ സംസാരിച്ചു. ഒരു ഡോക്യുമെൻ്ററി നിർമ്മിക്കാനുള്ള തന്റെ ആദ്യ യാത്രയാണ് അയോദ്ധ്യയിലേക്കുള്ളതെന്നാണ് സംവിധായകൻ പറയുന്നത്. 1983 മുതലുള്ള രാമക്ഷേത്രത്തിന്റെ ചരിത്രം പഠിച്ചതിന് ശേഷമാണ് ഡോക്യുമെന്ററി ചെയ്യുന്നതെന്നും പ്രിയദർശൻ കൂട്ടിച്ചേർത്തു.
മലയാളികളുടെ ഹിറ്റുകളുടെ റീമേക്ക് ചെയ്തായിരുന്നു പ്രിയദർശനും അക്ഷയ്കുമാറും ബോളിവുഡിൽ നിരവധി ആരാധകരെ സൃഷ്ടിച്ചത്. മോഹൻലാലും മുകേഷും അഭിനയിച്ച ബോയിംഗ് ബോയിംഗിന്റെ റീമേക്കാണ് ‘ഗരംമസാല’.‘റാംജിറാവു സ്പീക്കിങ്‌’ ആയിരുന്നു ‘ഹേരാ ഫേരി’. ‘ഭൂൽ ഭൂലയ്യ’യാകട്ടെ ‘മണിച്ചിത്രത്താഴി’ന്റെ റീമേക്ക് ആണ്. ‘വെള്ളാനകളുടെ നാട്‘ ആണ് ‘ഘട്ടാ മീഠ‘ യായത്. മാന്നാർ മത്തായിയുടെ അഡാപ്റ്റേഷനാണ് ‘ഭാഗം ഭാഗ്‘ തുടങ്ങിയവയാണ് പ്രിയദർശന്റെ പ്രധാനപ്പെട്ട ബോളിവുഡ് ചിത്രങ്ങൾ.
