തമിഴ് നടൻ വിജയിയുടെ രാഷ്‌ട്രീയ പ്രവേശനം ഇന്ന് രാവിലെയായിരുന്നു പ്രഖ്യാപിച്ചത്. തമിഴക വെട്രി കഴകം എന്നാണ് പാർട്ടിയുടെ പേര്. രാഷ്‌ട്രീ പ്രവേശനത്തിന്റെ പശ്ചാത്തലത്തിൽ ഏറ്റെടുത്ത സിനിമകൾ പൂർത്തിയാക്കി, അഭിനയം നിർത്തുമെന്ന് താരം പ്രഖ്യാപിച്ചിരുന്നു. ഇതിന് പിന്നാലെ സമൂഹമാദ്ധ്യമങ്ങളിലൂടെ ദുഃഖം അറിയിച്ചിരിക്കുകയാണ് താരത്തിന്റെ ആരാധകർ.
പ്രിയപ്പെട്ട താരത്തെ ഇനി ബിഗ് സ്ക്രീനിൽ കാണാൻ കഴിയില്ലെന്ന വിഷമമാണ് ഫാൻസിന്. സിനിമാ ജീവിതത്തിന് വിരാമം കുറിക്കാതെ രാഷ്ട്രീയത്തിൽ പ്രവേശിച്ചൽ മതിയെന്നാണ് കൂടുതൽ പേരും അഭിപ്രായപ്പെടുന്നത്. രാഷ്ട്രീയത്തിൽ വിജയ് വന്നാൽ എന്ത് മാറ്റമാണ് ഉണ്ടാകാൻ പോകുന്നത്, സിനിമയിൽ നല്ലൊരു സ്ഥാനമുണ്ടായിരുന്നതല്ലേ എന്നാണ് ഒരു ഉപയോക്താവിന്റെ ചോദ്യം. രാഷ്ട്രീയത്തിൽ വിജയ്‌ക്ക് എത്രത്തോളം വിജയിക്കാൻ സാധിക്കുമെന്നറിയില്ല. ചിലപ്പോൾ, ഇപ്പോഴുള്ള ഇമേജ് പോകാനും സാധ്യതയുണ്ടെന്നാണ് ആരാധകരിൽ ചിലർ അഭിപ്രായപ്പെടുന്നത്.
കരാറൊപ്പിട്ട സിനിമകൾ രാഷ്‌ട്രീയ പ്രവർത്തനത്തെ ബാധിക്കാതെ പൂർത്തിയാക്കുമെന്നാണ് വിജയ് പ്രഖ്യാപിച്ചത്. ശേഷം ജനസേവനത്തിനായി പൂർണസമയ രാഷ്‌ട്രീയ പ്രവർത്തകനാകും. ഡൽഹിയിൽ തിരഞ്ഞെടുപ്പ് കമ്മിഷൻ ഓഫീസിലെത്തി വിജയ് മക്കൾ ഇയക്കം ജനറൽ സെക്രട്ടറി ബുസ് ആനന്ദ് പാർട്ടിയുടെ രജിസ്ട്രേഷൻ നടപടികൾ പൂർത്തിയാക്കിയത്. അഴിമതി പൂർണമായി ഇല്ലാതാക്കി തമിഴ്നാട്ടിൽ വലിയാെരു മാറ്റത്തിന് ശ്രമിക്കുകയാണെന്നാണ് നടൻ വ്യക്തമാക്കിയത്.
