യാത്രകളെ ഇഷ്ടപ്പെടാത്തവരായി ആരും ഉണ്ടാകില്ല. എന്നാൽ സ്ഥിരം പോകുന്ന സ്ഥലങ്ങൾക്ക് പുറമെ വ്യത്യസ്തത ആഗ്രഹിക്കുന്നവരാണ് എല്ലാവരും. പ്രശസ്തിയുടെ പേരിൽ മാത്രമുള്ള ചില ലൊക്കേഷനുകൾ തേടി സഞ്ചാരികൾ പോകാറുണ്ട്. എന്നാൽ ചില യാത്രികർ അധികമാരും തേടി പോകാത്ത ഇടങ്ങൾ അന്വേഷിച്ചും ഇറങ്ങാറുണ്ട്. ഇത്തരത്തിൽ കഴിഞ്ഞ കുറച്ചു നാളുകളായി കോഴിക്കോടുകാരുടെ ഇഷ്ടപട്ടികയിൽ ഇടം നേടിയ ഒരു സ്ഥലമുണ്ട്.
പശ്ചിമഘട്ടത്തിന്റെ മടിത്തട്ടിൽ നിലകൊള്ളുന്ന ആനക്കാംപൊയിൽ ഇന്ന് നിരവധി വിനോദസഞ്ചാരികളാണ് എത്തുന്നത്. കോഴിക്കോട് ജില്ലയിലെ തന്നെ ഏറ്റവും മികച്ച അവധിക്കാല വിനോദസഞ്ചാര കേന്ദ്രമാകാൻ സാധ്യതയുള്ള ഇടമാണിത്. എന്നാൽ വേണ്ടത്ര പുരോഗതി ഇവിടെ ഉണ്ടായിട്ടില്ല. എന്നിരുന്നാലും ഇവിടേക്ക് നിരവധി സഞ്ചാരികളാണ് ഇന്നെത്തുന്നത്.
തിരക്കേറിയ നഗരത്തിൽ നിന്നും ശാന്തത തേടുന്നവർക്ക് ഇത് മികച്ച ഓപ്ഷനാണ്. ജില്ലയിലെ തിരുവമ്പാട് ഗ്രാമ പഞ്ചായത്തിൽ ഉൾപ്പെടുന്ന മലയോര ഗ്രാമമാണ് ആനക്കാംപൊയിൽ. പശ്ചിമഘട്ട മലനിരകളുടെ പടിഞ്ഞാറ് ഭാഗത്തായാണ് ഈ സ്ഥലം സ്ഥിതി ചെയ്യുന്നത്. വടക്ക് നീലിമലയും കിഴക്ക് വെള്ളരിമലയും തെക്ക് മരുതും കോട്ട് മലയും ചുറ്റി നിൽക്കുന്ന ഇടമാണിത്.
സഞ്ചാരികളിൽ അധികം ആളുകളും എത്തുന്നത് അരിപ്പാറ വെള്ളച്ചാട്ടം തേടിയാണ്. തിരുവമ്പാടി ടൗണിൽ നിന്ന് ഏകദേശം 15 കിലോമീറ്റർ അകലെയാണ് വെള്ളച്ചാട്ടം സ്ഥിതി ചെയ്യുന്നത്. ഇരുവഞ്ഞിപ്പുഴയുടെ കൈവഴിയാണ് ഈ വെള്ളച്ചാട്ടം എന്നതും പ്രത്യേകതയാണ്. തിരുവമ്പാടി പഞ്ചായത്തിലും വയനാട് ജില്ലയുടെ മേപ്പാടി പഞ്ചായത്തിലുമായി വ്യാപിച്ച് കിടക്കുന്ന മലനിരയാണ് വെള്ളരിമല മലനിരകൾ. ട്രക്കിംഗ്, റോക്ക് ക്ലൈംബിംഗ്, വന്യ ജീവി സങ്കേതത്തിലേക്കുള്ള യാത്ര എന്നിവ ഇവിടെ സാധ്യമാണ്. ആനക്കാംപൊയിലിനോട് ചേർന്നാണ് വെള്ളരിമലയുടെ സ്ഥാനം. കോഴിക്കോട് നിന്നും കെഎസ്ആർടിസി ബസിൽ ഇവിടേക്ക് എത്താം.
