ദിവസവും 100 കിലോമീറ്റർ സൈക്കിൾ യാത്ര, അങ്ങനെ തുടർച്ചയായി 42 മാസം നൂറ് കിലോമീറ്റർ സൈക്കിൾ ചവിട്ടി റെക്കോർഡ് സൃഷ്ടിച്ച പ്രമുഖ സൈക്ലിസ്റ്റ് അനിൽ കദ്‌സൂറിന് വിട. സൈക്കിൾ സവാരി പ്രിയർക്ക് പ്രചോദനമായിരുന്ന ബെംഗളൂരു സ്വദേശിയായ 45-കാരനെ ഹൃദയാഘാതമാണ് കവർന്നതെന്നാണ് റിപ്പോർട്ട്.
ഏകദേശം 1,250 റൈഡുകൾ എന്ന നാഴികക്ക‌‌ല്ല് അടുത്തി‌ടെയാണ് അദ്ദേഹം പിന്നിട്ടത്. ഈ നേട്ടം സമൂഹമാദ്ധ്യമങ്ങളിൽ പങ്കുവെച്ച ദിവസം തന്നെ അനിലിന് അസ്വസ്ഥത അനുഭവപ്പെട്ടിരുന്നു. തുടർന്ന് അദ്ദേഹത്തെ ആശുപത്രിയിൽ ചികിത്സയിൽ തുടരുന്നതിനിടെയാണ് അന്ത്യം.
2022 ഓഗസ്റ്റിൽ 10 ദിവസങ്ങളിലായി 100 കിലോമീറ്റർ ചലഞ്ച് നടത്തിയാണ് അനിൽ തന്റെ സൈക്ലിംഗ് യാത്ര ആരംഭിച്ചത്. തികഞ്ഞ അർപ്പണബോധത്തോടെയും അച്ചടക്കത്തോടെയും അദ്ദേഹം 100 കിലോമീറ്റർ സവാരി ദിനചര്യയാക്കി മാറ്റി. രാജ്യത്തുടനീളമുള്ളവർക്ക് അദ്ദേഹം പ്രചോദനമായി. 643 റൈഡുകൾ പൂർത്തിയാക്കിയ ഇറ്റാലിയൻ സൈക്ലിസ്റ്റിന്റെ റെക്കോർഡും അദ്ദേഹം മറികടന്നിരുന്നു.
