ചെന്നൈ: കഴിഞ്ഞ ആഴ്ചയായിരുന്നു നടൻ വിജയ് രാഷ്ട്രീയത്തിലേക്ക് ചുവടുമാറ്റിയത്. തമിഴക വെട്രി കഴകം എന്ന പാർട്ടി രൂപീകരിച്ച് വിജയ് ലക്ഷ്യമിടുന്നത് 2026-ലെ തിരഞ്ഞെടുപ്പാണ്. താരത്തിന്റെ രാഷ്ട്രീയ പ്രവേശനം വിജയത്തെക്കാൾ പരാജയമായിരിക്കും ഏറ്റുവാങ്ങുന്നതെന്നാണ് വിലയിരുത്തൽ.
ഈ അവസരത്തിലാണ് താര രാഷ്ട്രീയത്തെക്കുറിച്ച് നടൻ അരവിന്ദ് സ്വാമി മുമ്പ് പറഞ്ഞ ചില വാക്കുകൾ വീണ്ടും വൈറലാകുന്നത്. സിനിമയിൽ താരങ്ങൾ സഹായിക്കുന്നതും രക്ഷപ്പെടുത്തുന്നതും കണ്ട് ജീവിതത്തിലും അങ്ങനെ ചെയ്യുമെന്ന് ആരും കരുതരുതെന്നാണ് അരവിന്ദ് സ്വാമി പറയുന്നത്. വിജയ് അടക്കമുള്ള താരങ്ങളെ പരാമർശിച്ചായിരുന്നു അരവിന്ദ് സ്വാമി ഇത്തരത്തിലൊരു പ്രസ്താവന നടത്തിയത്. യുവാക്കളോടൊപ്പം നടത്തിയ ഒരു സംവാദ പരിപാടിക്കിടെയായിരുന്നു നടന്റെ ഇത്തരത്തിലെ പ്രതികരണം.
‘കമല ഹാസൻ സാറിന്റെ ആരാധകനാണ് ഞാൻ വിജയിയെയും എനിക്കിഷ്ടമുണ്ട്. എന്നുകരുതി ഇവർക്കൊന്നും വോട്ട് ചെയ്യാൻ പാടില്ല. താരങ്ങൾ പറയുന്ന പദ്ധതികളിലും അവരുടെ ലക്ഷ്യമെന്താണെന്നുമൊക്കെ പൂർണമായും ബോധ്യം വന്നതിന് ശേഷം മാത്രമേ അവർക്ക് വോട്ട് ചെയ്യാൻ പാടുള്ളൂ. അവരൊക്കെയും താരങ്ങൾ ആയിരിക്കാം, എന്നാൽ ഒരു സർക്കാരിനെ രൂപീകരിക്കാനുള്ള ശേഷി അവർക്കുണ്ടോയെന്ന് നിങ്ങളും ഞാനുമൊക്കെ എങ്ങനെയാണ് വിശ്വസിക്കേണ്ടത്.
സ്ക്രീനിൽ ഞാൻ ഒരുപാടു പേരെ രക്ഷിച്ചല്ലോ. ഇനി നാട്ടിലും എല്ലാവരെയും രക്ഷിക്കാൻ കഴിയും എന്ന ചിന്തയിൽ രാഷ്ട്രീയത്തിലേക്ക് വരുന്നവരുണ്ട്. ഇത്തരത്തിൽ രാഷ്ട്രീയത്തിൽ വരുന്നവർ ഒരു സംസ്ഥാനത്തിന്റെ നയരൂപീകരണത്തിന് എന്ത് ചെയ്യും എന്നും കൂടി നിങ്ങൾ ചിന്തിക്കണം. ക്രിയേറ്റീവായ ആളുകളെയും ഒപ്പം ചേർത്താൽ മാത്രമാകും നല്ലൊരു നയമെങ്കിലും രൂപീകരിക്കാൻ താരങ്ങൾക്ക് സാധിക്കയുള്ളൂ…’- അരവിന്ദ് സ്വാമി പറഞ്ഞു.
