കോഴിക്കോട്: മാഹിയിൽ നിന്നും ടിപ്പർ ലോറിയിൽ അനധികൃതമായി കടത്താൻ ശ്രമിച്ച ഡിസൽ പിടികൂടി. മുക്കം ഭാഗത്തേക്ക് കടത്താൻ ശ്രമിച്ച 3,000 ലിറ്റർ ഡിസലാണ് കൊയിലാണ്ടി ജിഎസ്ടി എൻഫോഴ്സ്മെന്റ് സ്ക്വാഡ് പിടികൂടിയത്. KL02Y-4620 എന്ന നമ്പറിലുള്ള ടിപ്പർ ലോറിയാണ് കൃത്യത്തിനായി ഉപയോഗിച്ചത്.
രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് അനധികൃത ഡീസൽ കടത്ത് പിടികൂടിയത്. സംഭവത്തിന് പിന്നിൽ വടകര തിരുവള്ളൂർ സ്വദേശികളാണെന്നാണ് വിവരം. ലോറിയുടെ പ്ലാറ്റ്ഫോമിൽ പ്രത്യേക ടാങ്ക് നിർമ്മിച്ച് ഇതിന് മുകളിൽ മെറ്റൽ നിരത്തിയ ശേഷമാണ് ഡീസലുമായി മാഹിയിൽ നിന്നും വാഹനം പുറപ്പെട്ടത്.
ഡീസൽ വിതരണം ചെയ്യുന്നതിനായി മീറ്ററും വാഹനത്തിൽ ഘടിപ്പിച്ചിരുന്നുവെന്ന് അന്വേഷണ സംഘം വ്യക്തമാക്കി. എസ്.ഡി ടാക്സ്, എഎസ്ടി സെസ് ഉൾപ്പെടെ 3,03,760 രൂപയുടെ പിഴയാണ് സംഭവത്തിൽ ഈടാക്കിയത്. കൂടാതെ ലോറി എംവിഡിയ്ക്ക് കൈമാറിയെന്നും ജിഎസ്ടി വകുപ്പ് അറിയിച്ചു.