തിരുവനന്തപുരം: രാജ്യത്തിന്റെ ഹരിത വിപ്ലവത്തിന്റെ പിതാവ് എം. എസ് സ്വാമിനാഥന് പരമോന്നത സിവിലിയൻ ബഹുമതിയായ ഭാരതരത്ന നൽകിയതിൽ സന്തോഷം പ്രകടിപ്പിച്ച് സുരേഷ് ഗോപി. എം. എസ് സ്വാമിനാഥൻ രാജ്യത്തിന് നൽകിയ സമാനതകളില്ലാത്ത സംഭാവനകൾക്ക് ലഭിച്ച ആദരവാണിതെന്നും സുരേഷ് ഗോപി ഫേസ് ബുക്കിൽ കുറിച്ചു. എം. എസ് സ്വാമിനാഥനൊപ്പമുള്ള ചിത്രവും താരം പങ്കുവച്ചു.
” രാജ്യത്തിനായി നിരവധി സംഭാവനകൾ നൽകിയ എം എസ് സ്വാമിനാഥൻ സാറിന് ഭാരതരത്ന ലഭിച്ചതിൽ സന്തോഷം അറിയിക്കുന്നു. കൃഷിക്കും സുസ്ഥിര വികസനത്തിനും നിങ്ങൾ നൽകിയ സമാനതകളില്ലാത്ത സംഭാവനകൾ നമ്മുടെ രാജ്യത്ത് മായാത്ത മുദ്ര പതിപ്പിച്ചിട്ടുണ്ട്. ഒരു യഥാർത്ഥ ദർശനത്തിന് അർഹമായ ബഹുമതി! നമ്മുടെ മാതൃരാജ്യത്തോടുള്ള നിങ്ങളുടെ അചഞ്ചലമായ പ്രതിബദ്ധതയുടെ തെളിവാണ് ഈ ബഹുമതി.” – സുരേഷ് ഗോപി കുറിച്ചു.
ഒരു മലയാളി എന്ന നിലയിൽ അഭിമാനം വാനോളമാണെന്നും അദ്ദേഹം അറിയിച്ചു. ”ആലപ്പുഴയിൽ മങ്കൊമ്പിനടുത്താണ് എന്റെ തറവാട് വീടെന്നതിനാൽ മങ്കൊമ്പുകാരന് ലഭിക്കുന്ന ഈ അത്യുന്നത ബഹുമതിയിൽ ഏറെ സന്തോഷവും അഭിമാനവും ഞാൻ പങ്കുവെക്കുന്നു” എന്ന കുറിപ്പോടെയാണ് താരം ഹരിത വിപ്ലവത്തിന്റെ പിതാവിനൊപ്പമുള്ള ചിത്രം പങ്കുവച്ചത്.
