തെന്നിന്ത്യൻ സിനിമാ പ്രേമികൾ ഏറെ ആവേശത്തോടെ കാത്തിരിക്കുന്ന ചിത്രമാണ് വാടിവാസൽ. വെട്രിമാരൻ സംവിധാനം ചെയ്യുന്ന ചിത്രത്തിന്റെ അനൗൺസ്മെന്റ് വീഡിയോ മാസങ്ങൾക്ക് മുൻപാണ് പുറത്തുവിട്ടത്. ജല്ലിക്കെട്ട് പ്രമേയമാക്കി എത്തിയ ചിത്രത്തിനായി സൂര്യയുടെ ആരാധകർ ആവേശത്തോടെ കാത്തിരിക്കുകയായിരുന്നു.
ഇപ്പോഴിതാ ചിത്രത്തിൽ നിന്ന് സൂര്യ പിന്മാറി എന്ന തരത്തിലുള്ള വാർത്തകൾ പുറത്തു വരുന്നത്. സൂര്യയ്ക്ക്് പകരം ധനുഷ് ആയിരിക്കും ചിത്രത്തിൽ നായകനായി എത്തുന്നതെന്നാണ് പുറത്തുവരുന്ന വിവരങ്ങൾ. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണം പുറത്തുവന്നിട്ടില്ല. വിടുതലൈ ആദ്യഭാഗത്തിന് ശേഷം വാടിവാസലിന്റെ ചിത്രീകരണം ആരംഭിക്കുമെന്നാണ് നേരത്തെ അണിയറ പ്രവർത്തകർ അറയിച്ചത്. എന്നാൽ പിന്നീട് ഇക്കാര്യത്തിൽ സ്ഥിരീകരണമൊന്നും ഉണ്ടായില്ല.
നിലവിൽ വിടുതലൈ രണ്ടാം ഭാഗത്തിന്റെ ചിത്രീകരണം ആരംഭിക്കാനുള്ള തിരക്കിലാണ് വെട്രിമാരൻ. ഈ സിനിമയുടെ ചിത്രീകരണം പൂർത്തിയായാൽ തന്റെ അടുത്ത ചിത്രം വാടിവാസൽ ആയിരിക്കുമെന്ന് വെട്രിമാരൻ അറിയിച്ചിരുന്നു. ചിത്രത്തിൽ സംവിധായകൻ അമീറും പ്രധാന വേഷത്തിൽ എത്തുന്നുണ്ട്.