യുവതാരനിരയെ അണിനിരത്തി ചിദംബരത്തിന്റെ സംവിധാനത്തിലിറങ്ങുന്ന ‘ചിത്രമാണ് മഞ്ഞുമ്മൽ ബോയ്സ്’. ചിത്രത്തിന്റെ ട്രയിലർ പുറത്തിറങ്ങിയതോടെയാണ് പ്രേക്ഷകർക്കിടയിൽ സിനിമയെക്കുറിച്ചുള്ള ഓരോ അപ്ഡേഷനും അറിയാനുള്ള ആവേശം വർദ്ധിച്ചത്. ഇപ്പോഴിതാ, സിനിമയുടെ റിലീസ് ഡേറ്റ് പ്രഖ്യാപിച്ചിരിക്കുകയാണ് അണിയറപ്രവർത്തകർ. ചിത്രം ഫെബ്രുവരി 22-നാണ് തിയേറ്ററുകളിലെത്തുന്നത്.
കൊച്ചിയിൽ നിന്നും വിനോദയാത്രക്കായി കൊടൈക്കനാലിൽ എത്തുന്ന ഒരു സംഘം യുവാക്കളെ ചുറ്റിപ്പറ്റി നടക്കുന്ന ചില സംഭവവികാസങ്ങളാണ് ചിത്രത്തിലൂടെ പറയുന്നത്. ദുരൂഹതകൾ നിറച്ച മഞ്ഞുമ്മൽ ബോയ്സിന്റെ ട്രെയിലർ രണ്ട് ദിവസം മുമ്പാണ് പുറത്തിറങ്ങിയത്. നിമിഷങ്ങൾക്കുള്ളിൽ തന്നെ വീഡിയോ യൂട്യൂബിൽ ട്രെൻഡിംഗ് ലിസ്റ്റിൽ ഇടം പിടിക്കുകയും ചെയ്തു.
ഒരു യഥാർത്ഥ സംഭവത്തെ പശ്ചാത്തലമാക്കിയാണ് മഞ്ഞുമ്മൽ ബോയ്സ് ഒരുങ്ങുന്നത്. ചിത്രത്തിൽ സൗബിൻ ഷാഹിർ, ശ്രീനാഥ് ഭാസി, ബാലു വർഗീസ്, ഗണപതി, ലാൽ ജൂനിയർ, അരുൺ കുര്യൻ തുടങ്ങിയവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തിന്റെ തിരക്കഥ ഒരുക്കിയിരിക്കുന്നതും സംവിധായകൻ ചിദംബരം തന്നെയാണ്.
