മുംബൈ: ഖത്തറിൽ തടവിലായ മുൻ ഇന്ത്യൻ നാവികരെ മോചിപ്പിക്കാൻ ഇടപെട്ടെന്ന സുബ്രഹ്മണ്യൻ സ്വാമിയുടെ വാദങ്ങൾ തള്ളി ബോളിവുഡ് താരം ഷാരൂഖ് ഖാൻ. ഇന്ത്യൻ നാവികരെ വിട്ടയ്ക്കാൻ ഷാരൂഖ് ഖാൻ ഇടപെട്ടെന്നായിരുന്നു സുബ്രഹ്മണ്യൻ സ്വാമിയുടെ ട്വീറ്റ്. ഇത്തരം നീക്കങ്ങൾ നടത്തുന്നത് കഴിവുറ്റ നേതാക്കളാണെന്നും തനിക്ക് അതിൽ ഒരു പങ്കുമില്ലെന്നും ഷാരൂഖാൻ വ്യക്തമാക്കിയെന്ന് അദ്ദേഹത്തിന്റെ ഓഫീസ് അറിയിച്ചു.
നരേന്ദ്ര മോദിയും ദേശീയ സുരക്ഷ ഉപദേഷ്ടാവ് അജിത് ഡോവലും പരാജയപ്പെട്ടപ്പോൾ ഷാരൂഖ് ഖാന്റെ സഹായം മോദി തേടിയെന്നായിരുന്നു സുബ്രഹ്മണ്യൻ സ്വാമിയുടെ പരാമർശം. നാവികരെ മോചിപ്പിച്ചതിലും അവർ വീട്ടിൽ സുരക്ഷിതരായി തിരിച്ചെത്തിയതിൽ ഏതൊരു ഇന്ത്യക്കാരനെപ്പോലെ താനും സന്തോഷിക്കുന്നതായി ഷാരൂഖ് ഖാൻ പുറത്തിറക്കിയ വാർത്താക്കുറിപ്പിൽ അറിയിച്ചു. അതേസമയം, സ്വാമിയുടെ പ്രസ്താവനയോട് വിദേശകാര്യമന്ത്രാലയം ഇതുവരേയും പ്രതികരിച്ചിട്ടില്ല.
