മാനന്തവാടി: പടമലയിൽ കാട്ടാനയുടെ ആക്രമണത്തിൽ കൊല്ലപ്പെട്ട അജീഷിന്റെ വീട് ബിജെപി ദേശീയ നിർവാഹക സമിതി അംഗം പി.കെ.കൃഷ്ണദാസ് സന്ദർശിച്ചു. തുടർന്ന് അദ്ദേഹം മാനന്തവാടി രൂപതാ മെത്രാൻ ബിഷപ്പ് ജോസ് പൊരുന്നേടവുമായി കൂടിക്കാഴ്ച നടത്തി. കേന്ദ്രസർക്കാരിന്റെ ശ്രദ്ധ ആവശ്യമായ വിഷയങ്ങൾ ബിഷപ്പ് കൂടിക്കാഴ്ചയിൽ അവതരിപ്പിച്ചു.
വന്യ ജീവികളുടെ ആക്രമണം മൂലം പൊറുതിമുട്ടുന്ന മലയോര കർഷകരുടെ ആവശ്യങ്ങൾ കൂടി പരിഗണിച്ച്, വന നിയമത്തിൽ അടിയന്തര ഭേദഗതിക്കായി കേന്ദ്രസർക്കാർ മുൻകൈയെടുക്കണമെന്ന് ബിഷപ്പ് ആവശ്യപ്പെട്ടു. ഇതുമായി ബന്ധപ്പെട്ട പതിനൊന്നോളം നിർദ്ദേശങ്ങൾ അടങ്ങുന്ന നിവേദനവും പി.കെ.കൃഷ്ണദാസിന് കൈമാറി.
വയനാടിന്റെ അടിസ്ഥാന സൗകര്യവികസനത്തിന്റെ ഭാഗമായി ബദൽ റോഡുകളുടെ സാധ്യതകൾ പരിശോധിക്കണം. സമാന്തര പാതയ്‌ക്ക് തടസമാകുന്ന വനം – പരിസ്ഥിതി മന്ത്രാലയത്തിന്റെ നയങ്ങളിൽ മാറ്റം വരുത്തണമെന്നും, വയനാട്ടുകാരുടെ ദീർഘകാലാഭിലാഷമായ സ്വപ്നം സാക്ഷാത്കരിക്കാനുള്ള നടപടികൾക്ക് മുൻകൈയെടുക്കണമെന്നും ബിഷപ്പ് കൂടിക്കാഴ്ചയിൽ ആവശ്യപ്പെട്ടു.
