ആധാർ വിവരങ്ങൾ വേഗം അപ്‌ഡേറ്റ് ചെയ്‌തോളൂ; സൗജന്യമായി പുതുക്കാനുള്ള സമയപരിധി ഉടൻ അവസാനിക്കും

രാജ്യത്തെ പ്രധാനപ്പെട്ട തിരിച്ചറിയൽ രേഖയാണ് ആധാർ കാർഡ്. അതിനാൽ ആധാറിലെ വിവരങ്ങൾ എല്ലായിപ്പോഴും കൃത്യമായിരിക്കണം.അതിനാൽ ഉടൻതന്നെ ആധാറിലെ വിവരങ്ങൾ പുതുക്കാൻ നിർദ്ദേശം നൽകിയിരിക്കുകയാണ് യുഐഡിഎഐ. ആധാറിലെ വിവരങ്ങൾ സൗജന്യമായി പുതുക്കാനുള്ള സമയപരിധി മാർച്ച് 14 ന് അവസാനിക്കും. 2023 ഡിസംബറിലാണ് ആധാർ പുതുക്കാനുള്ള സമയപരിധി മൂന്ന് മാസത്തേക്ക് കൂടി നീട്ടിയത്. പണച്ചിലവില്ലാതെ 25 ദിവസത്തിനുള്ളിൽ ആളുകൾക്ക് തങ്ങളുടെ ആധാർ വിവരങ്ങൾ അപ്ഡേറ്റ് ചെയ്യാവുന്നതാണ്.

ആധാർ പുതുക്കുന്നതിനുള്ള സൗജന്യ സേവനം ലഭ്യമാകുക myAadhaar പോർട്ടലിൽ മാത്രമാണ്. പേര്, ജനനത്തീയതി, വിലാസം മുതലായ ജനസംഖ്യാപരമായ വിവരങ്ങളാണ് ഓൺലൈൻ ആയി തിരുത്താൻ സാധിക്കുക. ഫോട്ടോ, ബയോമെട്രിക്, ഐറിസ് തുടങ്ങിയ വിവരങ്ങൾ അപ്‌ഡേറ്റ് ചെയ്യണമെങ്കിൽ ആധാർ കേന്ദ്രങ്ങളിൽ പോകേണ്ടി വരും. മാർച്ച് 14-ന് ശേഷം ആളുകൾ ആധാർ പുതുക്കുന്നതിന് പണം നൽകേണ്ടിവരും.

ആധാർ കാർഡിലെ വിവരങ്ങൾ സൗജന്യമായി അപ്ഡേറ്റ് ചെയ്യാം

ഘട്ടം 1: https://myaadhaar.uidai.gov.in/ എന്ന വെബ്‌സൈറ്റ് ലോഗിൻ ചെയ്യുക

ഘട്ടം 2: ‘ഡോക്യുമെന്റ് അപ്‌ഡേറ്റ്’ ഓപ്ഷൻ ക്ലിക്ക് ചെയ്യുക. ( അപ്പോൾ നിങ്ങളുടെ നിലവിലുള്ള വിശദാംശങ്ങൾ പ്രദർശിപ്പിക്കും.)

ഘട്ടം 3: വിശദാംശങ്ങൾ പരിശോധിച്ച ശേഷം ഹൈപ്പർലിങ്ക് എന്ന ഓപ്ഷൻ ക്ലിക്ക് ചെയ്യുക.

ഘട്ടം 4: ശേഷം ഡ്രോപ്പ്ഡൗൺ ലിസ്റ്റിൽ നിന്ന് ഐഡന്റിറ്റി പ്രൂഫ്, അഡ്രസ് ഡോക്യുമെന്റുകളുടെ തെളിവ് എന്നിവ തിരഞ്ഞെടുക്കുക.

ഘട്ടം 5: സ്‌കാൻ ചെയ്ത പകർപ്പുകൾ അപ്ലോഡ് ചെയ്യുക.