പരീക്ഷിക്കാം ടാംപോണുകൾ; ​പാഡുകളേക്കാൾ സൗകര്യപ്രദം, ​ഗുണങ്ങളുമേറെ; പക്ഷെ ഇക്കാര്യങ്ങൾ ശ്രദ്ധിച്ചില്ലെങ്കിൽ അപകടം

സ്ത്രീകൾ ആർത്തവ സമയത്ത് തുണികൾ ഉപയോ​ഗിച്ചിരുന്നതിൽ നിന്ന് സാനിറ്ററി നാപ്കിനുകളിലേക്ക് എത്തിയിട്ട് അധികം ദശാബ്ദങ്ങളായിട്ടില്ല. ഇന്നിപ്പോൾ അതും കടന്ന് ടാംപോണുകളും മെൻസ്ട്രൽ കപ്പുകളും യുവതികളുടെ പ്രിയതാരങ്ങളായി മാറി കഴിഞ്ഞു.

നാപ്കിനുകൾക്ക് പകരമായി എത്തിയ വസ്തുക്കളെയെല്ലാം ഒരു ഭയത്തോടെയാണ് പൊതുവെ സ്ത്രീകൾ സമീപിക്കാറുള്ളത്. അവ ഉപയോ​ഗിച്ച് നോക്കാൻ പോലും പലരും പലപ്പോഴും തയ്യാറാകാറില്ല. പാഡുകൾ ഉപയോ​ഗിച്ച് ശീലമായതിൽ നിന്നും മറ്റൊരു വസ്തു ഉപയോ​ഗിച്ച് നോക്കാനുള്ള അതൃപ്തി പലർക്കുമുണ്ട്.

ഇക്കൂട്ടത്തിൽ മെൻസ്ട്രൽ കപ്പുകൾ ഉപയോ​ഗിച്ച് തുടങ്ങിയ നിരവധി പേരുണ്ട്. എന്നാൽ ടാംപോണുകളെ അധികമാരും പരീക്ഷിച്ച് നോക്കാറില്ല. പാഡുകൾ ഉപയോ​ഗിക്കുന്നവർ ടാംപോണുകൾ ഉപയോ​ഗിച്ചാലുണ്ടാകുന്ന ​ഗുണങ്ങൾ എന്തെല്ലാമാണെന്നും അവ ഉപയോ​ഗിക്കുമ്പോൾ ശ്രദ്ധിക്കേണ്ട കാര്യങ്ങൾ എന്തെല്ലാമാണെന്നും നോക്കാം..

സിലിണ്ടർ രൂപത്തിലാണ് ടാംപോണുകൾ ഉള്ളത്. ഇവ കാഴ്ചയിലും ചെറുതായതിനാൽ കൈകാര്യം ചെയ്യാനും എളുപ്പമാണ്. ആർത്തവ സമയത്ത് യോനിക്ക് അകത്തേക്ക് ടാംപോൺ കയറ്റി വയ്‌ക്കുകയാണ് ചെയ്യേണ്ടത്. നാപ്കിനുകളുമായി താരതമ്യം ചെയ്യുമ്പോൾ അനവധി ​ഗുണങ്ങൾ ഇവയ്‌ക്കുണ്ട്.

നീന്തൽ കുളത്തിലും മറ്റും പോകുമ്പോൾ ധൈര്യമായി ഉപയോ​ഗിക്കാം. അടിവസ്ത്രത്തിൽ ഒരിക്കലും കറ പുരളുകയില്ല. പുറത്തേക്ക് നിഴലടിച്ച് കാണില്ല. എല്ലാതിനുമുപരി ടാംപോൺ വച്ചിട്ടുണ്ടെന്ന് സ്വയം തോന്നുക പോലുമില്ല. വളരെ വൃത്തിയായി യോനി പരിസരം ഇരിക്കുകയും ചെയ്യും. ആർത്തവ സമയത്ത് ശുചിമുറിയിൽ ഇടയ്‌ക്കിടെ പോകേണ്ടി വന്നാലും അതൊരിക്കലും ടാംപോണിനെ ബാധിക്കില്ല. മലമൂത്ര വിസർജ്ജനം എളുപ്പത്തിൽ നടത്താം. പാഡുകൾ ഉപയോ​ഗിക്കുന്ന സമയത്ത്, നിൽക്കുമ്പോഴും ഇരിക്കുമ്പോഴുമൊക്കെ അതിന്റെ സ്ഥാനം മാറിയാൽ അത് വീണ്ടും ശരിയാക്കി വയ്‌ക്കേണ്ട ബാധ്യതയുണ്ട്. എന്നാൽ ടാംപോണുകൾ വച്ചാൽ അത് പിന്നീട് തിരിച്ചെടുക്കുന്നതുവരെ സ്ഥാനം മാറുകയില്ല.

ശ്രദ്ധിക്കേണ്ട കാര്യങ്ങൾ

ടാംപോൺ വയ്‌ക്കുമ്പോൾ അത് ശരിയായ രീതിയിൽ തന്നെ കയറ്റി വയ്‌ക്കേണ്ടതാണ്. ടാംപോൺ വച്ച് കഴിഞ്ഞതിന് ശേഷം അത് അനുഭവപ്പെടുന്നുണ്ടെങ്കിൽ ഇനിയും അകത്തേക്ക് നീക്കേണ്ടതുണ്ട്. ആറ് മുതൽ എട്ട് മണിക്കൂറിനകം ടാംപോൺ മാറ്റണം. അതിൽ കൂടുതൽ സമയം യോനിക്ക് അകത്ത് ഇരിക്കുന്നത് ബാക്ടീരിയൽ അണുബാധയ്‌ക്ക് കാരണമാകും. അതുകൊണ്ടാണ് ഉറങ്ങുന്ന സമയത്ത്, രാത്രികാലങ്ങളിൽ ടാംപോൺ ഉപയോ​ഗിക്കരുതെന്ന് പറയുന്നത്. എട്ട് മണിക്കൂറിനേക്കാൾ കൂടുതൽ സമയം ഉറങ്ങി പോകാൻ സാധ്യതയുള്ളതിനാലാണ് രാത്രി ടാംപോൺ ഉപയോ​ഗിക്കരുതെന്ന് നിർദ്ദേശിക്കുന്നത്. മാത്രവുമല്ല, ഇവ ആർത്തവ സമയത്ത് മാത്രമേ വയ്‌ക്കാൻ പാടുള്ളൂ. അല്ലാത്ത വേളകളിൽ ടാംപോൺ പരീക്ഷിക്കുന്നത് അപകടമാണ്. ടാംപോണുകൾ ഉപയോ​ഗിക്കുമ്പോൾ toxic shock syndrome (TTS) സംഭവിക്കാനുള്ള സാധ്യതയും ഏറെയാണെന്ന് പഠനങ്ങൾ പറയുന്നു.