ഹൈദരാബാദ്: രഞ്ജി ട്രോഫി നേടാനായി ക്രിക്കറ്റ് താരങ്ങൾക്ക് വൻ വാഗ്ദാനം നൽകി ഹൈദരാബാദ് ക്രിക്കറ്റ് അസോസിയേഷൻ. അടുത്ത മൂന്നു വർഷത്തിനുള്ളിൽ രഞ്ജി ട്രോഫി നേടിയാൽ ടീമിലെ എല്ലാ താരങ്ങൾക്കും ബിഎംഡബ്ല്യു കാർ നൽകുമെന്നാണ് അസോസിയേഷൻ തലവൻ ജഗൻ മോഹൻ റാവുവിന്റെ വാഗ്ദാനം. കൂടാതെ ടീമിന് ഒരു കോടി രൂപയും ലഭിക്കും. താരങ്ങളെ പ്രചോദിപ്പിക്കാൻ വേണ്ടിയാണ് സമ്മാനങ്ങൾ നൽകുന്നതെന്ന് ജഗൻ മോഹൻ റാവു പറഞ്ഞു.
”അടുത്ത സീസണിൽ തന്നെ ലക്ഷ്യം വിജയം കാണണമെന്നില്ല. അതുകൊണ്ടാണ് അവർക്ക് മൂന്ന് വർഷത്തെ സമയം അനുവദിച്ചിരിക്കുന്നത്. ക്രിക്കറ്റിലെ സമഗ്രമായ മാറ്റമാണ് ഞങ്ങളുടെ ലക്ഷ്യം. നിലവിൽ ജിംഖാന ഗ്രൗണ്ടിൽ ഹൈദരാബാദ് ക്രിക്കറ്റ് അക്കാദമി ഓഫ് എക്‌സലൻസ് പ്രവർത്തിക്കുന്നുണ്ട്. വളർന്നു വരുന്ന താരങ്ങൾക്ക് അവരുടെ പ്രദേശത്ത് തന്നെ മികച്ച സൗകര്യങ്ങൾ ഒരുക്കാനായി നാല് സാറ്റലൈറ്റ് അക്കാദമികൾ ആരംഭിക്കാനും പദ്ധതിയുണ്ട്.” ജഗൻ മോഹൻ വ്യക്തമാക്കി.
രണ്ട് തവണയാണ് ഹൈദരാബാദ് രഞ്ജി ട്രോഫി കിരീടം നേടിയിട്ടുള്ളത്. 1937-38, 1986-87 സീസണുകളിലായിരുന്നു ഇത്. നിലവിൽ തിലക് വർമ്മയാണ് രഞ്ജിയിൽ ഹൈദരാബാദിനെ നയിക്കുന്നത്.
