മുളകിനോടും എരിവിനോടും മലയാളിക്കെന്നും പ്രിയമാണ്. അടുക്കളയിലെ പ്രധാനിയെ മിക്ക വിഭവങ്ങളിൽ നാം ചേർക്കാറുമുണ്ട്. കാന്താരിയും മാലിയും ഉണ്ട മുളകുമൊക്കെയാണ് നാട്ടിൻ പുറങ്ങളിലെ താരം. തടിച്ച് കൊഴുത്ത് ഉരുണ്ടിരിക്കുന്നവയാണ് മാലി മുളക്. ആരു കണ്ടാലും ഒന്ന് നോക്കി പോകും അത്രയേറെ ചന്തമാണ് മാലിക്ക്.
എരിവിനുമപ്പുറം നിരവധി ഗുണങ്ങളാണ് മാലി മുളകിനുള്ളത്. വളർച്ചയുടെ ഏത് ഘട്ടത്തിലും മുളകിനെ നമുക്ക് കൂടെ കൂട്ടാവുന്നതാണ്. ഭാരം കുറയ്ക്കാനും പ്രതിരോധശേഷി വർദ്ധിപ്പിക്കാനുമൊക്കെ മുളക് സഹായിക്കുന്നു. വിറ്റാമിനുകളുടെ കലവറയാണ് മുളക്. അതുകൊണ്ട് തന്നെ പ്രതിരോധശേഷി വർദ്ധിപ്പിക്കാൻ സഹായിക്കുന്നു. വിറ്റാമിൻ സി ധാരാളം അടങ്ങിയിട്ടുള്ളതിനാൽ ദിവസവും ഭക്ഷണത്തിൽ ഉൾപ്പെടുത്തുന്നത് നല്ലതാണ്.
കലോറി തീരെ ഇല്ലാത്ത പച്ചമുളകിൽ ആന്റി ഓക്സിഡന്റുകൾ ധാരാളം അടങ്ങിയിട്ടുണ്ട്. കാൻസറിനെ പ്രതിരോധിക്കുന്നതിലും മുളക് സവിശേഷമായ പങ്ക് വഹിക്കുന്നുവെന്ന് പഠനങ്ങൾ പറയുന്നു. പ്രോസ്റ്റേറ്റ് ഗ്രന്ഥിയുമായി ബന്ധപ്പെട്ട പ്രശ്നങ്ങളെ ചെറുക്കാനും മുളക് സഹായിക്കുന്നു. ഹൃദയാരോഗ്യത്തിനും മാലി മുളക് സഹായിക്കുന്നു. ഇതിലെ ക്യാപ്സൈസിന് വീക്കം കുറയ്ക്കാനും ഹൃദ്രോഗ സാധ്യത കുറയ്ക്കാനും കഴിയുമെന്ന് പഠനങ്ങൾ കാണിക്കുന്നു.
ശരീരഭാരത്തെ പിടിച്ചുനിർത്താനും മാലി മുളക് സഹായിക്കുന്നു. ക്യാപ്സൈസിന് വണ്ണം കുറയ്ക്കാനും സഹായിക്കുന്നു. മുളക് കഴിച്ച് മൂന്ന് മണിക്കൂറോളം ശാരീരിക പ്രവർത്തനങ്ങളുടെ വേഗത വർദ്ധിപ്പിക്കും. അതിനാൽ തന്നെ ഭാരം കുറയാൻ സഹായിക്കുന്നു. പച്ചമുളക് കഴിക്കുമ്പോൾ ശരീരത്തിൽ എൻഡോർഫിൻ എന്ന കെമിക്കൽ ഉത്പാദിപ്പിക്കപ്പെടുന്നു. ഇത് മാനസികനിലയെ നിയന്ത്രിക്കാനും ഉത്കണ്ഠ അകറ്റാനും സഹായിക്കുന്നു.