മാളികപ്പുറത്തിന് ശേഷം ഉണ്ണിമുകുന്ദന്റെ അത്യുഗം പ്രകടനവുമായെത്തുന്ന ചിത്രം ജയ്ഗണേഷിന്റെ ടീസർ പുറത്ത്. ഉണ്ണിമുകുന്ദനാണ് ഫേസ്ബുക്കിലൂടെ ടീസർ പങ്കുവച്ചത്. ആരാധകുടെ ആകാംക്ഷ ഇരട്ടിയാക്കുന്ന തരത്തിലുള്ള ടീസറാണ് പുറത്തിറങ്ങിയിരിക്കുന്നത്. മലയാളി പ്രേക്ഷകർക്ക് വിഷു കൈനീട്ടമായി ഏപ്രിൽ 11-നാണ് ചിത്രം തിയേറ്ററിലെത്തുന്നത്.
ഒരു കഥ പറയുന്നത് പോലെയാണ് ടീസർ ആരംഭിക്കുന്നത്. ഇനി എന്ത് എന്ന് തോന്നിക്കുന്ന രീതിയിൽ ആകാംക്ഷയൊരുക്കുന്ന ടീസറാണ് പുറത്തുവന്നത്. ഉണ്ണി മുകുന്ദന്റെ ഇതുവരെ കാണാത്ത തികച്ചും വ്യത്യസ്തതയാർന്ന പ്രകടനമാണ് ചിത്രത്തിൽ കാഴ്ചവച്ചിരിക്കുന്നതെന്ന് പുറത്തിറങ്ങിയ ടീസറിൽ വ്യക്തമാണ്. ദിവ്യാംഗനായ ചെറുപ്പക്കാരന്റെ സ്വപ്നങ്ങളും, ആ യുവാവിന്റെ ജീവിതത്തിൽ അപ്രതീക്ഷിതമായി വന്നെത്തുന്ന സൂപ്പർ പവറുമാണ് ചിത്രത്തിന്റെ സാരാംശം.
രഞ്ജിത്ത് ശങ്കർ തിരക്കഥയെഴുതി സംവിധാനം ചെയ്യുന്ന ചിത്രമാണ് ജയ്ഗണേഷ്. മഹിമ നമ്പ്യാർ നായികയാവുന്ന ചിത്രത്തിൽ ഒരിടവേളക്ക് ശേഷം ജോമോളും അഭിനയിക്കുന്നുണ്ട്. ഉണ്ണി മുകുന്ദൻ ഫിലിംസും രഞ്ജിത്ത് ശങ്കറിന്റെ ഡ്രീംസ് എൻ ബിയോണ്ടും ചേർന്നാണ് ചിത്രം നിർമ്മിക്കുന്നത്. ഹരീഷ് പേരടി, അശോകൻ, രവീന്ദ്ര വിജയ്, നന്ദു തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നു.
