അതിജീവനത്തിന്റെ കഥയുമായി മഞ്ഞുമ്മൽ ബോയ്സ് പ്രേക്ഷകരുടെ ഹൃദയം കവരുകയാണ്. ഇതിന് പിന്നാലെ യഥാർത്ഥ മഞ്ഞുമ്മലിലെ യുവാക്കളും ചർച്ചയാവുകയാണ്. ചിത്രത്തിൽ അഭിനയിച്ച ദീപക് പറമ്പോലിന് അഭിനന്ദനവുമായി എത്തിയിരിക്കുകയാണ് നടൻ അഭിനയിച്ച സുധി എന്ന കഥാപാത്രത്തിന്റെ ഭാര്യ. സമൂഹമാദ്ധ്യമത്തിലൂടെ ദീപക് തന്നെയാണ് അഭിനന്ദനം അറിയിച്ച കാര്യം പുറത്ത് വിട്ടത്.
യഥാർത്ഥ സുധിയുടെ എല്ലാ സ്വഭാവങ്ങളും ഉൾക്കൊള്ളിച്ചാണ് ദീപക് അഭിനയിച്ചതെന്നാണ് സുധിയുടെ ഭാര്യ പറഞ്ഞത്. അഭിനയം വളരെ നന്നായിട്ടുണ്ടെന്നും സുധിയുടെ ഭാര്യ പറഞ്ഞിരുന്നു. അഭിനന്ദനം അറിയിച്ചതോടെ ദീപക് സമൂഹമാദ്ധ്യമങ്ങളിൽ ചിത്രം പങ്കുവക്കുകയായിരുന്നു.
‘ഞാൻ സുധിയുടെ ഭാര്യയാണ്, സിനിമ കണ്ടു. വളരെ നന്നായിട്ടുണ്ട്. സിനിമയിൽ സുധി എങ്ങനെയാണോ അതുപോലെ തന്നെയാണ് യഥാർത്ഥ ജീവിതത്തിലും. ചന്ദനക്കുറി നിർബന്ധമാണ്.’- സുധിയുടെ ഭാര്യ പറഞ്ഞു.
ചിദംബരത്തിന്റെ സംവിധാനത്തിൽ ഫെബ്രുവരി 22-ന് തിയേറ്ററുകളിൽ എത്തിയ ചിത്രമാണ് മഞ്ഞുമ്മൽ ബോയ്സ്. കൊച്ചിയിൽ നിന്നും വിനോദയാത്രക്കായി കൊടൈക്കനാലിൽ എത്തുന്ന ഒരു സംഘം യുവാക്കളെ ചുറ്റിപ്പറ്റി അവിടെ നടക്കുന്ന ചില സംഭവവികാസങ്ങളാണ് ചിത്രത്തിലൂടെ പറയുന്നത്. മഞ്ഞുമ്മൽ ബോയ്‌സിന്റെ ഛായാഗ്രഹണം നിർവഹിക്കുന്നത് ഷൈജു ഖാലിദാണ്. സംഗീതം ഒരുക്കുന്നത് സുശിൻ ശ്യാമാണ്.
